Jowai, Naiwieng, 12: Ka Hynñiewtrep Integrated Territorial Organization (HITO) Jowai Circle ha ka sngi Balang ka la ujor lyngba ka dorkhas sha ka Jaiñtia Hills Autonomous District Council (JHADC) ha kaba ïadei bad ka jingai No Objection Certificate (NoC) pathar da ki Wahhe Shnong sha ki bar jylla.
Ka seng hadien ba kala ïoh ban ïakren ïa u Licensing Officer bad u Executive Member ka la pynpaw ïa ka jingsngewkhia halor kane ka jingai pathar ïa ki NoC sha ki bar jylla, namar mynta wat ïa ki jingtrei ba ki trai jylla ki nang ban trei hynrei ki Waheh Shnong kim salia ki shu ai la ka ai beit tang ban ïoh pisa.
U Licensing Officer bad u EM ki la ong ba ïa ka license ki hap ai beit lada ki ïoh jingbit lane ka NOC na ki rangbah shnong. Sa kawei ka seng kala maham ruh ïa ki hawker baki la pyndonkam bakla ïa ki license jong ki katkum ki kyndon ba la buh da ka Council namar kane ka ktah ïa ki trai shnong kiba ki trei ïa ka juh ka kam da kaba ki shu leit behïew ha kylleng ki shnong.
Hynrei kine ki hawker pat ki ruh ki shu behïew kum maki hi khlem peit lane burom ïa ki kyndon ba la buh da ka Council katkum ki jaka ba la thoh ha ki license jong ki (area of operation) kumta ka seng kala maham ïa kine ki bar jylla baka Council kahap ban weng shisyndon ïa ki license jong ki lada ki pteng ban leh ïa kane ka kam ong u samla Deibormi Siangbood uba dei u President ka HITO Jowai Circle.
Shuh ka seng kala pan ïa ka jingïatreilang bad ka Council da kaba ka Council kan khot mardor ïa baroh ki Rangbah Shnong khamtam ïa kito ki Commercial Area, kum ka Ïewmusiang, Newhill, Ladthalaboh, Mihmyntdu bad Phramer ba kin sangeh shwa ban ai ïa ki NOC sha ki bar jylla, kat ym pat dep ai rai da ka Council.
