Athletics : Lahduh ka Shillong Sports Association (EKH) ha ka liang ki shynrang ka Nongstoiñ District Sports Association (WKH) ki kynthei

Shillong, Jymmang 06: Ka lympung ïalehkai Meghalaya Games 2022 kaba saw kala poi noh sha kaba kut ha ka sngi Thohdieng mynta ka taïew hapdeng ka jingphuh jingphieng bad kaba shongkun bha ïa kaba la pynlong ha Indoor Training Hall jong ka SAI kaba don ha NEHU bad kaba dei ruh ka jaka kaba pynlong ïa shibun ki jingïalehkai.
Ïa kane ka lympung kaba la plie pyrda ha ka 3 tarik Jymmang la wan ban pynhap pyrda noh da ka Kong RV Suchiang kaba dei ka Chief Secretary jong ka sorkar jylla kaba la long kum ka kongsan, ha ka jingïadonlang ka Kong WAM Booth Director ka tnad ïalehkai, Bah John F Kharshiïing Working President ka MSOA, General Secretary Bah Finely Pariat, ki nongkitkam jong ki state associaiton, ki nongïalehkai bad kiwei kiwei.
Ha kane ka sngi ka Kong RV Suchiang kala sam ruh ïa ki khusnam ha ka liang ka Athletics, ha kaba ka Shillong Sports Associaiton (SSA) ha ka liang ki shynrang kaba mihkhmat na bynta ka East Khasi Hills kala la ïoh rah ïa ka nam lahduh katba ha ka liang ki kynthei ïa ka nam lahduh la rah da ka Nongstoiñ District Sports Association kaba mihkhmat na bynta ka West Khasi Hills.
Ka West Jaiñtia Hills District Sports Association bad ka Ri-Bhoi ki jop ha ka kyrdan ba ar ba kynthup shynrang bad kynthei.
Shwa ban sam khusnam la pynlong ka jingpyni sap ïalehkai lyngba ki nongïalehkai Gymnastics kiba la pynshohbiej shi katdei eh ïa baroh ki nongïalehkai bad ruh ïa ki kongsan. Ka jingïalehkai Gymnastics kala ïoh ban shim bynta ha kane ka Meghalaya Games 2022 hadien saw snem ba la pynkhie im biang ïa ka.
Kadei ruh kawei na ki jingïalehkai kaba itynnad ha kane ka Meghalaya Games ha kaba ki nongïalehkai kiba dei ruh ki khynnah bad samla kynthei kila lah shisha ban pyni bad sei ïa ka sap kaba kyrpang ha kaba kum kane ka jait jingïalehkai.
Ka Kong RV Suchiang haba ai jingkren ha kane ka sngi pynhap pynhap pyrda kala pynpaw ka jingsngew ieit ïa ka jingpyni ki nongïalehkai ïa ki sap ïalehkai
“Man kiba la ïashim bynta ha kane ka jingïalehkai kidei ki champion,” ong ka Kong RV Suchiang.
“Phi dei ka lawei jong ka jylla ha kaba u Myntri Rangbah ka jylla u Conrad K Sangma u kwah ban kyntiew shuh shuh ïa ki nongïalehkai bad kane ka sdang nala ka jong ka jylla. Kala dei ka por ïangi kum ki kmie ki kpa ban pynshlur ïala ki jong ki khun ban shim bynta ha ki jingïalehkai,” la ong ka Kong RV Suchiang da kaab bynrap ba ha India jan mar shiteng ki skul kim don ïa ki madan ïalehkai na kata ka daw ba u Myntri Rangbah u la pynthikna ban tei shuh shuh ki jaka ïalehkai ha kylleng ka jylla ban pynthikna ba kin ïoh ki jaka ïalehkai hala ki jong ki jaka.
Kala ai khublei ruh ïa ka MSOA, ïa u Myntri Rangbah, ïa u myntri ki kam ïalehkai Bah Banteidor Lyngdoh bad ïa ka tnad ïalehkai, ki volnteer bad ki nongïalehkai kiba la lah ban pynlong ïa kane ka lympung ïalehkai kaba jop.
Na ka liang u bah John Kharshiing haba kren shwa kane, u la pynkynmaw ba kane kadei ka lympung ïalehkai Meghalaya Games kaba heh duh, ha kaba la sdang nyngkong da khyndai tylli ki jait jingïalehkai ha u 2001 bad khatar tylli ha u 2004 bad haduh khat hynriew snem ym shym la pynlong shuh tad haduh u 2020 hadien ba ka sorkar kala rai ban pynkhie im biang ïa kane ka lympung ïalehkai.
Kane ka lympung kala kiew sha ka 14 jait ki jingïalehkai ha u 2020 bad mynta u snem 2022 kala kiew haduh 19 tylli ka jingdon ki jait jingïalehkai bala ïashim bynta da 3,000 ngut ki nongïalehkai, ha kaba kiba bun ki synjuk ïalehkai ruh ki kwah ban shah kynthup ban ïoh ïashim bynta ha u snem ban wan.
U Working President u la pynpaw ruh ha kaba ïadei bad ka Sports Policy kumjuh ka National Education Policy khnang ba ka jingïalehkai bad ki nongïalehkai ka jylla kin kiew shaphrang.
Na ka liang ka Indian Olympic Association, lyngba u President u Narinder D Batra, u la phah ka shithi bad ïaroh ïa ka jingtrei shitom bad ka jinglah jong ka MSOA ban pynlong ïa kane ka lympung, lyngba ka jingkyrshan jong ka sorkar jylla kaba la rai ruh ban pynlong ïa kane ka lympung manla u snem bad ong ba kane kan ïarap ïa ka Meghalaya ha ka jingpynkhreh ïa ka 39th National Games.
Ha ka sngi plie pyrda na ka liang u Myntri Rangbah ka jylla u Conrad K Sangma, u la pynbna ba ha u snem ban wan (2023) ïa kane ka lympung yn pynlong ha Tura bad ha Jowai ha u snem 2024, bad lyngba kane kan nang kyntiew ïa ka jingïalehkai, kan ïarap ïa ki nongïalehkai ba kin nang ïai kiew shaphrang.