Artatien ki paitbah ïa ka jingkular jong ka sorkar ban pynheh ïa ka surok Nongstoiñ – Sohpian

Nongstoiñ Ïaïong 12: Ka surok na Nongsohpian sha Nongstoiñ kaba jngai kumba hynñiew kilomitar ka dei ka surok kaba don kam bha hynrei ka dei pat ka surok ka rit.Ka jingrit jong katei ka surok ka buh jingeh bha ïa ki nongleit nongwan da ki kali man la ka sngi.
Nalor kata man la ka sngi da ki spah ngut ki khynnah skul naduh Nongsohpian, Porsohsat, Sylleiïawkheiñ, Nongritong bad Pyndenlawar kiba leit sha ki skul bap her bap her kiba don ha sor Nongstoiñ kata naduh Sib Sing Memorial Govt Secondary & Higher secondary, KJP, Synod Sepngi, Anderson, Public, St Xavier bad kiwei kiwei ki skul ki ïaid da ka kjat lada dei ha ka por ba ki kali ki bun ka buh jingma ïa ki.
Kum ban pynkynmaw ba ha u snem ba la dep na ka liang u bah Prestone Tynsong Symbud Myntri Rangbah ka jylla uba bat ruh ïa ka tnad PWD ha ka jingwan jong u ha Nongstoiñ u la pynshai sha ki paitbah ba ka sorkar ka la dep mang kumba 21 klur tyngka tam na ka bynta ban pynheh bad pynbha ïa katei ka surok ha kaba ki paitbah ki la kmen bad khmih lynti ba ka sorkar kan sa pyntrei noh hynrei haduh kine ki sngi ym pat don dak ei ei ruh em lait noh tang ka jingtheh khyndew jong u kontraktor ha ki rud jong ka surok baroh arliang namar ba ka jingkhong ka um ha ka por lyiur ka la pynlong ïa ka surok kum u budlum katba ha baroh arliang ki la long kum ki kharai bah ba jylliew.
Ha kaba ïadei bad ka jingpynbna jong u Symbud Myntri Rangbah ka jylla ki paitbah nongleit nognwan, ki nongñiah kali bad ki paitbah nongshong shnong haba ïakren bad u nongthohkhubor ki la pynpaw ïa ka jingsngewkhia bad ka jingartatien kaba jur da kaba ong ba imat u bah Prestone Tynsong u la shu kren pyllait jynhaw khlem don ka jingshisha bad ka lah ban long tang ka jingkren danda ban pynbiej ïa ki paitbah.
Nalor kata ki la ong ruh ba ha u snem 2020-21 ha ka por ba ka sorkar ka la phah moramot ïa katei ka surok ki paitbah jong ki shnong kiba don ha shilynter jong katei ka surok bad kiwei kiwei ki la dawa na ka sorkar ba kam dei ban shu phah moramot hynrei ka dei ban pynheh khnang ba kan pynsuk ïa ki kali kiba leit ba wan bad kiba kit ïa ki mar ki mata na Shillong sha Nongstoiñ.
Ki paitbah ki la ong ruh kumba u bah Prestone Tytnsong u la ong ba ka sorkar ka la mang pisa na ka bynta ban pyneh ïa katei ka surok ka dei ban pynshai sha ki paitbah balei ba ka jingpyntrei ka katei ka surok kam pat sdang haduh mynta bad lada kan pyntrei ruh ka dei ban pynshai haduh lano kan sdang khnag ba ki paitbah kin tip namar na ka jingbym pat pyntrei haduh mynta ka buh ha ka jingartatien kaba jur.