Shillong, Nohprah 12: Hapdeng ka jingshongshit ka jingïaid u Myntri Rangbah ka jylla na kawei ka jaka sha kawei pat ban sam ïa ka pisa jingarap ba san hajar tyngka lyngba ka FOCUS kaba dei ka skhim na ka bynta ki nongrep, la mih ka jingartatien na kiba bun ki dkhot jong ka Producers Group.
Ki Producers Group kidei ki kynhun jong ki nongrep kiba la la thaw ha ki shnong ha kylleng kylleng ki jaka jong ka jylla bad uwei pa uwei u dkhot u ïoh san hajar tyngka na ka bynta ka kamrep jong u. Ki dkhot kidei lang ki shynrang bad ki kynthei.
Ka jingmih jong ki jingartatien kadei hadien ba la mh ki nongïalam jong ka Seng BJP da kaba kynnoh ba kane kam dei ka jingïarap, hynrei kadei ka ram ba la shim da ka sorkar jylla. U Bah Ernest Mawrie, President ka BJP, u la ong ba kane ka skhim FOCUS kadei ka ram ba la shim da ka sorkar jylla ïa kaba dei ban siew hadien. Kumta ki paidbah kiba ïoh ïa kane ka skhim ruh ki hap ban siew kum ka ram hadien habud ryngkat ka sut.
Hynrei na ka liang ka sorkar khamtam ka Seng NPP ka la kam ba kane ka san hajar tyngka kadei ka jingïarap kaba la ai da ka sorkar na ka bynta ki nongrep, khnang ba kin lah ban pynbha ne pynheh ïa ka kam rep jong ki.
Kaei kaba la pynartatien ïa ki dkhot jong ki Producers Group ka long namar ba ka BJP kadei ka Seng kaba don lang ha ka sorkar MDA ryngkat bad ka NPP bad kiwei de ki Seng.
Nalorkata ki don ruh kiba la pynpaw ka jingartatien ïa kane ka pisa ba ïoh na ka FOCUS bad bun ki la sdang ban kynnoh ba kadei ka skhim elekshon, namar ba ka jingsam ïa kane ka pisa ka long khambun tang ha ki Constituency ba la mihkhmat da ki MLA ka NPP. Katba ha kiwei pat ki Constituency ba mihkhmat da ki MLA na kiwei pat ki Party ym pat shym la sam satia bad lada sam ruh la sam tang khyndiat khynsoit.
Shuh shuh, la kynnoh da ki dkhot ki Producers Group ba ha ka por ba sdang ka jingpynrung dkhot kam da pyrkhing haduh katta katta, hynrei katba nang slem ka la nang pyrkhing da kaba shim noh tang iwei iwei na kawei ka longïing, wat lada na kajuh ka ïing ki bun ki nongrep. “Kane ka jingleh ka la wanrah ka jingïaknieh ban ïoh rung kyrteng ha ki Producers Group”, la ong ki dkhot.
Na ka liang ki dkhot jong kine ki Group ki la kyntu ïa ka sorkar ba kadei ban pynmih da ka jingpynshai kaba thikna la kane ka pisa san hajar kadei ka ram ne ka jingïarap kaba ki dkhot jong ki Group kin ïoh.
