Shillong, K’ Lyngkot 07: U Myntri Rangbah ka jylla u Conrad K Sangma un sa pynïaid ïa ka jingïalang ka kynhun ki Myntri ka sorkar ka ban long arsngi kaba la khot ka Cabinet Retreat ha Sohra naduh ka 10 tarik u Kyllalyngkot haduh ka 11 tarik u Kyllalyngkot.
Ki Myntri ka sorkar jylla bad ki heh ophisar jong ka sorkar jylla kin sa ïadonlang ha kane ka jingïalang ka kynhun ki Myntri.
Ka jingthmu jong kane ka program ka long ban pynïoh ïa ka rynsan ïa ki tnat sorkar ha kaba ha kane kin sa pynpaw ïa ki prokram jong ki bad ïa kaei kaba ki la sdang bad kumjuh ruh kin don ki jingïasyllok ïa ki jingduna lyngba ki jingpyrshang ki jingïatreilang khnang ban lah ban kynjoh ïa ki thong bad ki jingthmu kumba la buh.
Haba kren sha ki lad pathai khubor halor kane, u chief secretary ka sorkar jylla u Bah DP Wahlang u la ong, “Baroh ki tnat sorkar kin sa ïa shonglang bad ki dkhot ka kynhun Myntri bad kin ai ïa ki presentation halor ki jingthmu jong ki kam ki ban dang pynïaid shakhmat na ka bynta u snem 2025, kiei ki rukom pyrkhat kam, kiei ki skhim, kiei ki jingthmu ba ki tnat ki kwah ban kynduh na ka bynta u snem 2025.”
U la pyntip ba ka kynhun Myntri kan kynduh ruh ïa ki kynhun raplade ne ki self help group ha ki thaiñ nongkyndong. Kin sa leit ruh sha ki jaka ka shnong Nohriat, kin ïakynduh ïa ki SHG kylleng kine ki thaiñ ha ka 11 tarik une u bnai bad kin wan phai biang ban bteng ïa ka jingïalang bad ki tnat bapher bapher.
“Baroh ki jingthmu bad ki jingpyrkhat ka long ban kren ha baroh artylli ki sur kaba dei na ka liang ka saiñ pyrthei bad kumjuh na ka liang ki bor pynïaid ki tnat khnang ban sngewthuh kiei ki tnat kiba donkam ban leh na ka bynta u snem 2025 bad kam dei ban don kano kano ka kam kaba lait ne thylli bad kam dei ruh ban don ka jingïasngewthuh bakla, baroh ngin kren da kawei ka sur ba kine ki dei ki thong ba ngi don ha ki jingmut jing pyrkhat bad kine ki dei ki kam ba ngi donkam ban leh bad ka long ruh kaba kongsan ban tei ïa ka jingshaniah bad na ka liang ki ophisar kin sa pyni ïa kaei kaba ki lah ban leh na ka bynta ki tnat jong ki bad ki Myntri kin sa sam ïa baroh ki polisi treikam kaba ki don ha ki,” u la bynrap.
