Shillong, Jylliew 28: Dang hynnin ka sngi, ka kynhun Myntri jong ka jylla ka la buh kyrteng thymmai ïa ki katto katne ki Shnong bad ki Surok.
Mynta ka sngi pat, U Myntri Rangbah Symbud ka jylla, u Bah Prestone Tynsong, u la ïathuh ba shen ka sorkar kan sa ainam noh ha u Thomas Jones ïa ka surok naduh Umtyngngar haduh Nongsawlia. U Thomas Jones, udei u Mishoneri ba nyngkong eh ka Balang Presbyterian na ri Wales ban wan shakri hangne ha Ri Khasi. La ju tip ruh ïa u kum u Kpa ki dak thoh Khasi.
Haba kren ha ka jingïalang ha Dr. H. Gordon Robert Hospital, u Bah Tynsong, u la ong ba ïa katei ka surok yn ai kyrteng noh ka Thomas Jones Road kum ka dak ban pynsah kynmaw ïa une u Kpa ki dak thoh Khasi. “Ïa kane ngin sa rai noh shen ha ka jingïalang jong ka kynhun Myntri”, la ong u Bah Prestone.
Kane ka jingai kyrteng ïa ka surok ha u Thomas Jones, ka long ka jingwan ïakynduh ki nongïalam Balang na Sohra.
Sa kawei pat ka surok kaban ainam ha uwei pat u Mishoneri na ri Wales, kadei ka surok ha Jaïaw kaba don hajan ka Robert Hospital, ha kaba u Bah Prestone u la kyntu ïa ki bor pynïaid jong kane ka Hospital ban phah da ka jingthoh, khnang ba ka sorkar kan ïoh ban pyrkhat ban ai kyrteng noh ïa kane ka surok ka Dr. H. Gordon Roberts Road.
