Ar tylli ki shnat pynmih bor ding ba don ha EJHD hynrei dang bun ba dang kyrduh bording : Damewanhi

Khliehriat, Naiwieng 28: Haba kren ha ki rynsan ïalap election, ban pynshai ruh shaphang ka synshar ka khadar kaba khuid ba suba (Clean Polictic) u kyrtong jong ka VPP u ban iakhun na ka 6-Khliehriat Constituency, u bah Damewanhi Rymbai, u la kren ruh halor ka jingkyrduh bor ding ha East Jaiñtia Hills District bad ong ruh ba ka long shihsa kaba sngew lyngngoh ba hapoh ka district ki don ar tylli ki shlem pynmih bor ding, ka Myntdu Leshka Project-Stage 1, kaba don ha shnong Suchen bad ka Power Grid Station kaba don ha Deinchynrum, hynrei ka rukom ioh bor ding pat ka dang duna shibun.
Haba kren halor katei ka phang, u bah Dame, u la ïathuh ba kane ka jingduna ka bor ding (low voltage) ka jia bha ha shnong Wapung ha kaba tang shu poi ka por jan miet, ka bor ding ka la duna, ki briew ki kim lah shuh ban pyndep ïa kino kino ki kam kiba dei da ka bor ding electrict, kum kaba shet ja, kaba pyndonkam ïa ki refrigerator, ym lah ban treikam da ki computer bad kiwei kiwei ki kam kiba da ka bor ding electrict namar ka jingduna palat ka bor ding.
U la kynthoh jur ruh ïa ka jingleh ka tnat bor ding, ha kaba ki don ki longiïng kiba ïoh bor ding lyngba ka BPL, ka bor ding na ka bynta kiba duk kaba ki hap ban siew ha ka dor kaba rit, hynrei ka tnat ka pynpoi bill sha ki long iïng haduh hadien 7-8 snem, kumta don ki longiïng kiba kynduh jingeh ban siew ïa ka bai bor ding bad haba kim lah ban siew ka tnat ka wan ot noh ïa ka bor ding.
Kaba sngewlyngngoh ruh ban ïohsngew ba ka shnong Suchen kaba dei ka shnong kaba don ka Myntdu Leshka Project ka dang ioh bor ding dang myn ha u snem ba la leit “ Ha ka jingshisha ngim dei shuh ban kyrduh bor ding bad ngi dei ruh ban ioh ei ïa ka bor ding, hynrei ki pynbiang bor ding bha pynban sha ki company ba shong ki dkhar kiba shu wan kamai spah, katba ïa ngi pat kiba don hok ban ïoh, kiba dei ki nong shong shnong ba pura, kiba dei ki nongjied ïa ki nongmihhmat, kiba hap ban ïa peit ïa ka eh ka shon ngim ju sngew ba kin ïakren ei ei ha kaba ïadei bad kine ki ar tylli ki project, kum kaba thungkam thungjam ïa ki briew ka thaiñ ka ban ioh jingmyntoi ki paidbah” pynpaw u bah Dame.
U la ïathuh ruh ba ka sorkar mynta ka dang pynkhreh shuh shuh ban shna ïa ka DPR ka ban shna ïa Myntdu-Leshkha Stage-2 ha shnong Bataw, ïa kane ki paidbah kim tip satia, u la kynthoh ba kane ruh ka dei ka jingthmu kaba dei ka jingleh sop sop ka sorkar tang ban ïoh ban kamai spah na kane.
Haba u la pynpaw ïa kane ka phang bad kumjuh ruh kiwei kiwei ki phang kiba ïadei bad ka imlang ka sahlang, u bah Damewanhi, u la ong ba lada u Blei u ibit bad lada ki paidbah ki ailad ïa u ban long kum u nongmihkhmat bad da ka jingiatreilang bad ki paidbah un weng noh ïa baroh ki jingeh kiba don ha ka im lang ka sah lang.
Na ka liang utei u kyrtong u la ïathuh ba mynta u la lah ban pyndep haduh mar shiteng ki shnong kiba hap hapoh ka 6-Khliehriat Constituency ha ka jingiaid lynti jong u ban ïalap bad pynsgewthuh paidbah ïa ka mat ban wanrah ïa ka synshar ka khadar kaba khuid ba suba kaba ki ong ruh ka Clean Politic.