Shillong, Lber 25 : U Myntri ka tnad C&RD ba dei ruh u MLA ka Mylliem, Bah Hamlet Dohling ha ka sngi Thohdieng u la plie paidbah ia u mawnongrim na ka bynta ki ar tylli ki projek ba kynthup ia ka surok kaba pyniasoh na surok bah sha Umjasai, Lawsohtun Block -V bad kumjuh ruh ban shna pynbha ia ka surok bad nala um ha Block 2, Block 5 bad Block 6 kiba la mang ban pynlut haduh 2.50 klur tyngka.
Haba pynbna ba kitei ki projek kin sdang noh naduh ka taiew ban wan, u Myntri haba kren ha ka jingialang kaba long ha Community Hall Block 2, u la ong ruh ba um kwah satia ba ka jingbuh mawnongrim kan long tang ka rongphong katba ka kam pat sa sdang trei hadien lai ne saw snem.
“Kane ka por kam dei shuh ban long kumta. Haman la ki jaka ba nga buh mawnongrim ka kam kadei beit ban sdang noh tang hadien lai ne saw sngi,” u la bynrap shuh shuh. Katkum ka jingong jong u, lada shu bunkam tang ka buh mawnongrim hynrei ka kam pat kam sdang khlem artatien kan poi ka por ban duh lut ia ka jingduh jingshaniah na ki nongshong shnong bad kumjuh na ki nongialam shnong.
U Myntri u la iathuh ruh ba na katei ka kam, ki kontraktor naduh ka sngi Nyngkong kin sa sdang noh ia ka jingtreikam jong ki khnang ba ka kam kan iaid stet noh. Ha kajuh ka por u pan ruh ka jingiatrei lang jong ki nongialam shnong, ki kontraktor ki nongshong shnong bad ruh na ka tnad treikam.
Ha kane kajuh ka sngi, u Myntri u la noh sngewbha ruh 50 hajar tyngka sha ka Lawsohtun Sports Club kaba dei ban aireng ha kane ka sngi Saitjain ha madan Polo. La pynbna ruh ba mynta u dang ap sa tang ka jingmang tyngka na ka bynta ban tei noh ia ka indoor stadium kaba 10 klur tam kaba thmu ban tei ha Lawsohtun.
La ioh ruh ia ka jingkren na u Chief Engineer ka tnad PWD (Roads) u GK Marak, nangta na u Rangbah Shnong Bah H Rynjah, ki riewrangbah ka thain bad kiwei kiwei.
