Nongpoh, Jylliew 22: Namar ka jingbym burom ki Bank ïa ka sngi kyrpang ba la tip kum ka Thomas Jones Day ha ka jylla Meghalaya ban burom ïa u kum uta u Kpa jong ki Alphabet Khasi, Ka HYC Umïam Circle mynta ka sngi ka la leit ban khang ïa ki ar tylli ki Bank jongka State Bank of India halor ka jingplie ïa ki bank khlem da burom ïa kane ka sngi kyrpang ba la pynbna kum sngi Shuti ha ka jylla Meghalaya.
Kine ki ar tylli ki Bank ba la leit khang da ka HYC Umïam Circle ki kynthup ïa ka Bank SBI ha Umïam bad kawei pat ka bank jong ka SBI ha ICAR, Umïam kiba khlem ai shuti ïa ki Nongtrei bad ki pynlong trei beit mynta ka sngi kaba dei ka sngi kyrpang ba la tip kum ka Thomas Jones Day.
Ki Nongïalam ka HYC Umïam Circle ha ka jingïalam u General Secretary, u Bah Dondor Thabah ryngkat u Environment Secretary, u Bah Paraban Kharwanjah lem bad ki dkhot ki leit ban phah khang ïa kitei ki ar tylli ki bank jong ka SBI, ka dei hadien ba ki la ioh jingtip ba ki bor pynïaid kitei ki Bank ki pynlong trei beit mynta ka sngi ba la tip kum ka Thomas Jones Day, ba la pynbna shuti ha ka jylla Meghalaya ban burom ïa utei u rangbah uba dei u Kpa jong ki Alphabet Khasi ba la wan bet ïa u symbai jong ka jingnang jingstad ha ka jylla Meghalaya.
Haba pyntip sha ki Lad Pathai Khubor, kitei ki nongïalam ka HYC, ki la ong ba ka daw kaba la pynlong ïa ki nongïalam ka seng ban leit phah khang ïa kitei ki Bank, ka dei halor ka nongrim ba kim burom satia ïa ki sngi Shuti hapoh ka jylla Meghalaya khamtam ki sngi kyrpang ba ka Bri u Hynnñiewtrep ka burom khamtam kane ka sngi ba ka jylla ka burom ïa une u Kpa jong ki Alphabet Khasi uba la wan na shiliang duriaw ban wan rah jingshai da kaba kyntiew ïa ka pule ka puthi bad ban kyntiew ïa ka jingnang jingstad ha ka jylla Meghalaya.
Shuh shuh, u la ong ruh ha kane ka jingleit phah khang ka seng ka sngewkmen ruh ba ki bor pynïaid kitei ki bank kim shym la ai ñia ne pyrshah bad ki la kloi ban ïa snoh kti lang ban khang noh ïa kine ki Bank ha kane ka sngi shuti ba kum ka seng ruh nangne shakhmat ka kyntu ïa kino kino ki ophis sorkar ne ki bank ba ki dei ban burom beit ïa kano kano ka sngi shuti hapoh ka Bri u Hynñiewtrep, u la bynrap.
