Nongstoiñ, Nailur, 23: Ka jingbym treikam jong u tower u ba ka Airtel company ka la pynïeng ha ka shnong Nongspung, kawei na ki shnong kiba don ha khappud bad ka jylla Assam kaba jngai tang kumba ar kilomitar na ka shnong Kyrshai, ka la pynlong ïa ki paitbah katei ka thaiñ ba kin ïakynduh shibun ki jingeh, khamtam ha kine ki sngi ha kaba ki nongshong shnong ki la treikam lyngba ki mobile network, khamtam ban pyntip paitbah ha kino kino ki por ba don ki jingjia ba sngewsih.
Hadien ba ki paitbah ki la ud na ka por sha ka por ki nongïalam bad ki dkhot jong ka FKJGP Kyrshai area unit, mynta ka sngi hat majai ka 23 tarik Nailur ki la leit ban sha katei ka jaka ban jurip ïa utei u tower.
U bah Probin Snar secretary ka FKJGP Kyrshai area unit haba pyntip ha u nongthoh khubor, u la ong ba ha ka jingleit jurip ïa utei u tower, ka seng ka la lap ba utei u tower u don tang ka shynrong khlem don kiwei pat ki tiar kiba dei ki bynta kiba ka mobile network ka treikam. Ka jingwan buh jong ka Kompeni Airtel ïa utei u tower ka long tang kum ka jingpynthame bad pynbiej kai ïa ki paitbah.
Utei u nongïalam ka seng u la ong ruh ba ha ki bnai ba la dep, ki nongïalam ka seng ki la leit ban ïakynduh ïa u bah Garod L.S.N Dykes IAS Deputy Commssioner ka West Khasi Hills ha ophis treikam jong u, ha kaba ki la aiti ruh ha u da ka jingthoh ba un shimkhia lem ban bthah ïa ka Airtel Kompeni ban pynbiang ïa ka mobile network ha ka thaiñ Kyrshai.
U la ban jur namar ba ka dei ka jaka khappud bad ka Assam bad ki don bun bah ki kam ba ki paitbah nongshong shnong ki hap ban treilang bad ka sorkar man la ka sngi, khamtam lada don ki jingïatyngkhuh bad ki briew jong ka sorkar Assam, hynrei haduh mynta ka Airtel Kompeni kam shym la patiaw satia.
U la ong ruh ba ka jingbym patiaw jong ka Airtel Kompeni ka dei ka jingbym burom ïa u Deputy Commissioner u ba dei u khlieh nongsynshar jong ka district bad ïa ki paitbah nong shong shnong ha ki thaiñ khappud.
Ha kajuh ka por u la ong ba lada ka Airtel Kompeni kam burom bad kam kheiñ snep ïa u Deputy Commissioner, na ka liang ka seng ruh kan ym kheiñ snep shuh ïa ka Airtel Kompeni bad kan ñiew ïa ka Airtel kum ka Kompeni thok
U la ong ruh ba ka seng ka ai por tang ar taïew ïa katei ka Kompeni ba kan pynbiang ïa ka network ha katei ka thaiñ. Lada kam lah ban pynbiang ha poh ka por ba la buh, ka seng kam banse ban leh da ka kam da kaba shu leit ban pynkyllon ïa utei u tower bad die nar jot, ne ban shim da kiwei pat ki lad katba ka seng ka sngew bit.
