Shillong, K’ Lyngkot 07: Ka President jong ka ri India ka Droupadi Murmu kan sa wan jngoh arsngi ïa ka jylla Meghalaya na ka bynta ban plie ïa ka rakhe ïa ka jingdap 50 snem ne golden jubilee celebration jong ka ICAR Research Complex, Umïam and Farmer’s Expo 2025 ha kaba ha kane ka prokram kin don haduh 100 tylli ki dukan ha ka 9 bad 10 tarik u Kyllalyngkot.
Haba ïathuh ïa kane, u chief secretary u Bah DP Wahlang u la ong, “Ka jingwan jong ka President kan long hapdeng ka por 11.30 baje mynstep bad 2.30 baje nohphai sngi. Ka President kan sa hiar lyngba ka liengsuiñ ha Umroi bad kan sa shim bynta ha ka prokram ha ICAR complex. Kan ym wan sha nongbah Shillong. Hadien ka prokram kan sa peit phai biang sha Guwahati bad kan sa leit noh sha kiwei pat ki kam.”
Ha kane ka prokram yn donlang ruh u Myntri ka Sorkar pdeng ba khmih ïa ka tnat Rural Development, Agriculture & Farmers Welfare u Shivraj Singh Chouhan, u Myntri Rangbah ka jylla u Conrad K Sangma bad kiwei kiwei.
