Ar sngi leit jngoh ki samla pule ka District ïa ka nongbah Delhi ban tip halor ka synshar khadar
Jowai, Nohprah 18 : Ki bor pynïaid District ka West Jaiñtia Hills kala ïalam haduh 17 ngut ki samla pule ban leit jngoh ïaka nongbah New Delhi naduh ka 11 tarik haduh 12 tarik u Nohprah, 2025, halor ka jingthmu ba ïoh jingtip shaphang ka rukom synshar paidbah jong ka ri India katkum ki riti treikam.
Ïa kitei ki samla pule la synran lang da ka Coordinator ka Vevotolu Kezo, IAS, SDO (Sadar), West Jaiñtia Hills, Jowai, u Assistant Coordinator ma Iaidbha Phawa, Extra Assistant Coordinator ma Kynphammi Ryngkhlem bad ki Youth Icons kynthup ïaka Sawakani Lakiang bad u Alexender Lyngdoh.
Ha kane ka jingleit jngoh ba ar sngi, ki nongïashim bynta ki la leit ban jngoh ïa ka Parliament jong ka Ri India haka 11 tarik u Nohprah bad kila ïashim bynta haka jingïalang jong ka Winter Session naduh ka por 11 baje mynstep haduh 12 baje mynsngi. Shwa ban sdang ka jingïalang la pynlong ïa ka jingpynshai sha ki samla pule ha kaba ïadei bad ka PRIDE (Parliamentary Research and Training Institute for Democracies) bud sa ka jingïakren bad u Deputy Secretary, Lok Sabha Secretariat.
Shuh shuh kila ïoh jinghikai ruh halor ka jingtreikam jong ka Parliament katkum ka riti synshar, ka jingïadei hapdeng ki lai tylli ki tnad kata ka Legislature, Executive bad Judiciary ha ryngkat ki rukom treikam jong ki.
Ki nongïashim bynta kila leit jngoh ruh ïa ka Rashtrapati Bhawan, ka jaka sah jong ka President ba donburom jong ka ri India bad ka Amrit Udyan, kiba la ïohi ban sakhi ïa ki jingtei ba pawnam bapher bapher katkum ka riti dustur bad kiwei de.
La pynkut da ka jingleit jngoh da kaba ïalam ïa ki sha Rashtrapati Bhavan Museum. Katba ha ka por janmiet, ki nongïashim bynta ki la leit jngoh ïa ka India Gate bad ka National War Memorial jong ki shipai kiba la aiti ïa la ka jong ka jingim.
Ha ka 12 tarik Naiwieng, ki nongïashim bynta ki la leit sha Nehru Planetarium ban ïoh jingtip shaphang jinglong ka Suiñbneng. Hadien kata ka jingleit jngoh ïa ka Pradhanmantri Sangrahalaya bad kila sakhi ruh ïa ki jaka ba don ki dur, ki tiar, ki kot ki sla bad ki jingtip shaphang ki Myntri Rangbahduh nalor kiwei de.
Na ka liang ki nongïashim bynta bad ki samla pule ki la pynpaw ïa ka jingkmen ban ïoh lad haka ban leit jngoh ïa ki jaka ba paw jong ka Ri, khamtam eh ki lad jingtip shaphang ka riti synshar jong ka Ri India.