Shillong, Rymphang 23: Ka kynhun ïalehkai phutbol ba la rangbah jong ka jylla Meghalaya, sa shi sien ki la mad biang ïa ka namrem ha kawei na ki jingïalehkai na bynta ka 77th National Football Championship jong ka lympung Santosh Trophy 2023-24 pyrshah ïa ka Assam na ka thup ïakhun jong ka Group-A.
Ha kane ka jingïakhun ka Meghalaya ka la shah pynliem da 2-1 kol ha ka Assam kaba ïalehkai da tang shiphew ngut ki player ha madan phutbol kaba ha Itanagar hynne ka sngi.
Baroh kine ki lai kol (kynthuplang jong baroh ar kynhun) ki la wan ha ka jingïakhun jong ka kylla step, ha kaba ka Assam ka la ïoh ban lamkhmat nyngkong lyngba u Milan Basumatary tang hadien 8 minit ba la ïaid ka por.
Hynrei ka jylla ka la wanphai ban pynïakhaid lyngba u Sheen Sohktung ha ka minit ba 32. Shuwa ban sa khylliap ïa ka jingïakhun ha ka kylla step, u Joydeep Gogoi u la buh biang ïa ka Assam hakhmat da kaba thep ïa ka kol kaba ar ha ka 45 minit.
Haduh kaba kut jong ka por ka Assam ka la lah ban ïada na ka jingshah thep ban pynthikna ïa ka namjop.
Watla ka kynhun ka la mad ïa ka namrem, hynrei lah ban kdew ba ka Meghalaya ka la long ka kynhun kaba khlaiñbor haba nujor ïa ka rukom lehkai hynrei kam shym la lah ban pynurlong ïa kiba bun ki kabu ba ka la ïoh ha kane ka jingïakhun.
shiphew minit hadien ba la ïaid ka kylla miet, u Birkhang Daimary, rangapkol ka Assam, u la shah sei da ka red card hadien ba u la kum ktah ïa ka bol shabar jong ka phyllaw kol (box) kaba la pynlong ïa ka Assam ban shah pynduna da 10 ngut ki player.
Hynrei watla ka kabu ka long ïa ka jylla na ka jingduna player u wei ka liang pyrshah, ka Meghalaya kam shym la ïohlad ban pynkhihjar.
Da ar tylli ki namrem, ka Meghalaya ka dang ïaineh sha ka kyrdan ba khadduh na ka Group, katba ïa ka Assam kane ka dei ka namjop kaba nyngkong.
Ka Meghalaya kan sa ïalehkai biang pyrshah ïa ka Kerala la Sngi U Blei ha ka por 2:30 baje nohphaisngi.
