Ar ngut ki MLA barim kin ïakhun pyrshah ïa u Sitting MLA ha Rambrai Constituency

Ka elekshon ban jied ïa ki nongmihkhmat sha ka Ïing Dorbar Thaw Aiñ ka jylla ha u 2023, ka lah ban long kaba jyrwit jyrwat haduh katta katta bad kan long ruh ka election, kaba kito ki paidbah nongthep vote kiba kheiñ kor ïa ka pisa bad kiba kloi ban die tad dor ïalade kin sa paw pyrthei haba shit haba shai, namar kumba ong ki riew shemphang ba ka sur ki paitbah ka dei ka sur u Blei kan sa urlong khlem artatien.
Haba pyrshang ban twad jingmut na ki nongïalam jong ki seng saiñ pyrthei bapher bapher bad na ki paitbah nongthep vote jong ki lai tylli ki Constituency kiba hap ha West Khasi Hills, ka sur kaba mih na ki ka long ba ha ka election 2023 lada kino kino kiba kwah ban ïaleh election lymda kim pat don da ki klur tyngka ki dei ban shong khop ha ïing namar kin ym jop da lei lei ruh em.
Don napdeng ki riew rangbah kiba ong ba ha kine ki sngi la ka dei ha ki shnong ki thaw, ki balang, ne ha ka saiñ pyrthei, ïa kiba duk lada ki bha bad ki dei kiba tip briew tip blei bad kiba stad bad shemphang katno katno ruh kin ym ñiew kor shuh. Uwei u rangbah u bym kwah ban pynpaw kyrteng ïalade u la ong ba ki don ki nongïalam balang kiba lada uno uno u dkhot ka balang um ju poi sha ïing mane baroh shisnem lynter ruh, hynrei u lah ban pynbiang ïa ki jingainguh balang kim ju kynmaw ban leit ïasyllok.
Ka long kumjuh ha ka saiñ pyrthei ba lada ha ka taïew shuwa ban poi ka sngi thep vote ki paitbah ki ïatur sha ïing jong ki kyrtong ban leit pan pisa. U la ong ruh ba don napdeng ki paitbah ba shuwa ban poi ka sngi thep vote lada don san ngut ne hynriew ngut ki kyrtong, kin leit ban pan pisa na baroh, hynrei ha ka sngi thep vote pat tang shisien thep ym ar, lai ne saw sien. Nalor kata u la ong ba lada phai dien ha ka election 2018 kiba jop ki dei tang ki heh saipan bad ki business man suda.
Haba phai pat ha ka Election 2023 ha West Khasi Hills, ka Rambrai Jyrngam Constituency kan dei ka Constituency kaba ka jingïaleh kan long kaba ithamula tam na baroh ki Constituency, namar ki don ar ngut ki MLA barim ki ban ïakhun pyrshah ïa u sitting MLA kata u bah K.P.Pangñiang President rangbah ka HSPDP u ba dei ruh u MLA barim ka Constituency, u bah Francis Pondit R.Sangma MLA barim ka Mawshynrut u ba lah ban ïaleh na ka TMC, pyrshah ïa u bah Kimfa S.Marbañiang u MLA ka Congress u ba la leit kyrshan mynta ïa ka sorkar MDA, ha kaba ka sur na kiba bun ba lang ka ong ba shen un sa rung noh sha ka NPP bad un ïaleh na katei hi ka party.
Ka jubab kaba shai kdar kan sa paw ha ka sngi ñiew vote ha u 2023 bad dei hangta yn sa lah ban pynshisha, katno ngut kiba biej pisa bad ki bym salia ban die tad dor ïalade ha ka shikhyllipmat bad katno ngut kiba sngewthuh ïa ka dor jong ka shi vote ka jong ki.
Namar ha ka por election wat lada u kyrtong u ai da ki lak tyngka sha kawei kawei ka Polling station, kiba khung ïa ka lah bad phew lak ki dei tang ki nongïalam katba ki paitbah paidlang te lait na ka ar spah haduh san spah tyngka kin ym ïoh tam, lait noh tang ki polling agent shi hajar haduh ar hajar tyngka ki lah ban ïoh kum ka bai bylla sngi. Hynrei lada ki thep ne kim thep ruh ka shong ha ka mon jong ki namar ym don ba tip ne ïohi.