Ar jaka yn talasi ïa ka koit ka khiah ki mrad bamdoh ba wanrah na shabar :Myntri Veterinary

Shillong, Nailar 11 : U Myntri ka tnad Animal Husbandary and Veterinary, Bah AL Hek ha ka sngi Nyngkong u la ong ba ki don haduh ar tylli ki jaka talasi ïa ka koit ka khiah jong ki mrad bamdoh kiba wanrah na shabar jylla da kaba pyntip ruh ba ka jingshna ïa kine ki health checkup centre ki la ïaid shakhmat mynta.
“Ngi la ïoh pdiang ïa ka jingkyrshan pisa na ka sorkar India na ka bynta ban shna ïa kine ki centre kiban talasi ïa ka koit ka khiah jong ki mrad bamdoh – kawei ha Narang kaba ha Ri Bhoi District bad kawei pat ha Nidangpur ha rilum Garo,” ong u Myntri haba kren bad ki lad pathai khubor hadien ka jingïakynduh ïa ki nongïalam ka HITO.
U Myntri u la ïathuh ruh ba kawei na kine ki centre yn sa pyndep noh shen khnang ban ïoh sdang pyntreikam noh.
“Nga la dep bthah ïa ka tnad ba kan pynstet shaid shaid ïa ka jingtrei,” u la ong da kaba ïathuh ruh ba ki la don bun bha ki kynhun bad ki seng kiba la pynpaw ka jingsngewkhia bad ïa ka jingdonkam ban don ïa ka jaka talasi ïa ka koit ka khiah jong ki mrad bamdoh kiba wan rung shapoh ka jylla.
Haba kren pat halor ka jingkynnoh ba ka don ka jingkhaii beaiñ ïa ki masi bad kiwei sha ka ri ba marjan, u Myntri u la ong ba ka sorkar jylla ka la shimkhia bha ïa kane ka bynta ha kaba ki BSF ryngkat ki pulit ka jylla ki ju ïoh kem na ka por sha ka por ïa ki masi ba thmu khaii beain bad wat ïa ki briew ba donkti ruh.
U ong ruh ba na ka liang ka sorkar hi kan ym ailad da lei lei ruh ba ka jingkhaii beain ïa ki mrad bamdoh kan ïoh jaka.
Na ka liang u Myntri u la ïathuh ba ki Deputy Commissioner na ka por sha ka por ki ju buddien ïa kane ka kam bad ong ruh ba ka ju don ruh ka jingpeitngor kaba man ka por ban khanglad ïa ka jingkhaii beain sha kawei pat ka ri.
Shwa kane, na ka liang ka HITO ka la dawa na u Myntri ba dei ban pynduh pyndam noh ïa ka jingkhaii beain ïa ki mrad bamdoh bad ruh halor ka jingïoh rung pathar ki mrad bamdoh na kiwei ki jylla sha Meghalaya.