Ar hajar tam ki samla ba wan ïashim bynta haka Annual Youth Convention ka JDCYM

Jowai, K’Lyngkot 15: Ka Annual Youth Convention kaba XVI jong ka Jowai Diocese Catholic Youth Movement kaba lai sngi, kaba la sdang naduh ka 12 tarik January 2024 ha madan Ialehkaibol ka Marianhill Higher Secondary School, Jowai kala kut hynnin ka sngi 14 tarik January 2024, ha kaba la wan ïashim bynta da kumba arhajar laispah ngut ki khun samla jong ka Balang na ki khatphra tylli ki Parish jong ka Jowai Diocese.
Ha kane ka Youth Convention kaba lai sngi, ki samla kila shim ïa ka ktien maitphang na ka bynta ka snem 2024, kaba la shim na ka Shithi jong u Paul Apostol sha ki Ehasus 6:1 “PHI KI KHUN TO KOHNGUH ÏA KI KMIE KI KPA JONG PHI HA U TRAI”. Ha ka jingkylla jong ka juk, ka jingïaid jong ka por, ka juk bad ka por jong ki kor ki bor (Science & Technology) ki khun kiba la nang la stad i kumba kim burom bad kohnguh shuh ïala ki kmie ki kpa kiba duna ka jingnang jingstad bad halor kane ka jingïohi kaba byrngut byrnget, ki samla Shynrang & Kynthei ha kane ka Youth Convention jong ki, ki la shim halor kane ka mat “Phi ki khun to kohnguh ïala ki kmie ki kpa jong phi ha U Trai”.
Ha kane ka Convention kaba lai sngi, ki Samla, kila ïoh ïa ki kyntien kren sneng kren kraw bad kyntu kynpham kiba sngewtynnat bad kiba dung haduh khleiñ shyieng bad ki ban pynsah kynmaw na ki Nongsharai mynsiem jong ki kum na u Rev. Fr. Simeon Sungoh, Rev. Fr. John Mikhel Marboh bad na kiwei de ki Nongsharai mynsiem.
Shwa ban pynkut ïa kane ka sngi la pynlong ïa ka jingkñia Mas Iukharist, kaba la lamkhmat da u Most. Rev. Ferdinand Dkhar d.d. Bishop ka Jowai Diocese ha ryngkat ka jingsynran lang ki Lyngdohsohblei kiba la ïawan synran ïa ki khun samla na ki Parish bapher bapher jong ka Jowai Diocese.
U Most Rev. Ferdinand Dkhar, ha ka sneng ka kraw bad kyntu kynpham ïa ki khun samla jong ka Diocese u ong kumba ki samla kila shim ïa ka maitphang na ka bynta ka snem 2024 “Phi ki khun to kohnguh ïala ki kmie ki kpa kum ha U Trai” to long ki samla kiba kohnguh sneng ïala ki kmie ki kpa bad kiba tieng burom ïa U Blei nyngkong eh.
Nangta u ong ban tieng burom ïa U Blei bad ban kohnguh ïa ki kmie ki kpa ka mut ban kohnguh ïa ki hukum jong u Blei bad ïaki kmie ki kpa bad haba ngi kohnguh ym tang da ki ktien hynrei da ki kam kyntu bad pynkut u Bishop Ferdinand Dkhar.
Hadien ka jingmane Sakrament bad kyrkhu ïa ki paidbah da ka Sakrament bakhuid tam ka Duwan, shwa ban pynhiar ïa ka Lama jong ka Seng (Jowai Diocese Catholic Youth Movement) da u ma Wailadmiki Shylla MLA uba long ruh u MLA ka 2 Jowai Assembly Constituency, la don ka cultural programe ki ba pynbyrngia ïa ki samla bad ïa ki paidriewngeit kum ka “Khasi Gospel Dance, na ka Parish Khliehriat, ka Shadpliang & Shad-sahep na ka Jowai Parish, ka Shad Rongkhli na ka Parish Amlarem bad kiwei de ki ruwai ki siaw tynrai kiba don jingmut bad kiba shoh mynsiem.
U Ma Wailadmiki Shylla MLA, uba long u kongsan ha kane ka sngi, haba ai ki kyntien sneng kyntien kraw ïa ki khun samla jong ka Jowai Diocese, u ong ba um kwah ban kren jrong naba ki samla kila ïoh ïa ka sneng ka kraw bad ka jingkyntu kynpham na ki Nongsharai mymsiem kaba ki la ïoh ha kine ki laisngi linter (12-01-2024-14-01-2024). La katta ruh u ong ba donkam ban pynkynmaw ïa ki samla naba bun sien ki jingbha lane ki jingsniew ki mih na ki samla. Nangta u ong “Ko samla to kiar na kaba sniew bad to leh ïa kaba bha, im ka jingim kaba bha kaba miat, to tei ïa ka lawei ka longïing longsem kaba neh kaba skhem ban bha ban miat ka longbriew man briew ha ka burom ka akor haka jaitbynriew bad ha khmat ka pyrthei.
Khatduh eh shwa ba un pynkut ïa ka jingkren u ma Wailadmiki MLA haba jubab ïa ka Memorandum kaba ki samla ki la ai ha u, ula ai arlak tyngka na ka bynta ba kin sdang ban shna ïa ka Ophis treikam jong ki ha Lumbihsyntu, Bishop’House bad na ka bynta kane ka jingthmu jong ki samla ka Jowai Diocese ban tei ïa ka Ophis treikam jong ki, ki la ïoh ruh ïa ka jingïarap kumba lai-lak tyng na u Ma Vincent H. Pala uba long ruh u MP jong ka Shillong Parliamentary Constituency. La pynkut ïa kane ka sngi da kaba u ma Wailadmiki Shylla uba long u kongsan, ula pynhiar ïa ka Lama jong ka Seng.