Nongstoiñ, Rymphang 20: Naduh dang step ha ka sngi 21 tarik, ki paitbah kin mih na la ki jong ki rympei ïing ban leit sha la ki jong ki jong ki polling station ban thep ïa ka vote jong ki na ka bynta ban jied ïa ki MDC ha kane ka kynti.
Haba phai sha ki lai tylli ki constituency kiba hap ha West Khasi Hills, dei tang ka Nongstoiñ kaba dei ka constituency ba na ki 45 hajar tam ki nongthep vote ki don tang katto katne ngut ki bym dei ki Khasi.
Katba ha ki ar tylli ki constituency ka Rambrai Jyrngam bad ka Mawshynrut ki paitbah nongthep vote ki la ïakhleh lang Khasi bad Garo. Ha kitei ki constituency ki pait nongthep vote Khasi bad Garo ki la jan ïa ryngkat ha ka jingbun pait.
Haba phai sha ki ar tylli ki constituency baroh ki kyrtong ki dei ki Khasi bad don napdeng jong ki, kiba don ka jingïadei paralok kaba jan bha bad ki pait nongthep vote kiba dei ki Garo. Don ruh napdeng jong ki kyrtong kiba ha ka kren ka khana ka ktien ka thylliej ruh, ki dei kiba pnah bha bad don ruh napdeng ki kyrtong ki bym pat ju ïadei kam ne paralok bad wat ïa ki shnong ba shong ba sah da ki pait nongthep vote kiba dei ki Garo ruh kim tip satia ki don haei, ki long kumno bad ka imlang sahlang ka roi ka par, ka kamai ka kajih ka long kumno.
Ym lah ban len ruh ba ha kitei ki ar tylli ki constituency ka Rambrai Jyrngam bad ka Mawshynrut, kino kino ki kyrtong ba ki pait nongthep vote na ki shnong Garo ki don ka jingsngew jan bad kiba ïoh ïa ka jingshanniah na ki, kin kham ïoh shibun ka vote bad lada kin khlaiñ ha ki shnong Khasi dei kita ki ban poi sha ka thong.
