Shillong, Jylliew : U MLA ka Mawlai u Bah PT Sawkmie da ka jingdom hynne ka sngi u la ai por ar bnai ïa ka tnad Public Health Engineer (PHE) bad Public Work Department (PWD) ha ka ba ïa dei bad ka surok hapoh ka thaiñ naduh Mawlai Petrol Pump haduh Mawlai Mawroh kaba la tip kum ka long round road ba ki dei ban pyndep bad ban sdang noh ïa ka jingpyntrei.
Haba kren hadien ba la dep jurip ïa ka surok bad ki heh ophisar ka PHE bad kumjuh bad jong ka PWD u bah PT Sawkmie u la dawa ba ka tnad PHE ka dei ban pyndep noh ïa ki jingshna jong ka halor kane ka surok hapoh ka ar bnai, namar la shisnem tam ki la ai por bad ïai shah, hynrei kim pat lah ban pyndep haduh mynta.
U la dawa ruh ba ka tnad PWD pat ka dei ban sdang shna noh naduh ka 1 tarik u Nailur mynta u snem, mar ïa dep ka PHE ïa ki jingpyntrei jong ka ha kane ka surok.U Bah Sawkmie, u pynpaw ba u la sngewdom bad bitar bha haba ïa dei bad ka PHE ka bym shym la pyndep la ka kamram,u la ïai shah bad u laïia trei ryngkat la shisnem tam bad kane ka tnad treikam.
Ha ka ba ïa dei bad kane ka surok u la kyrpad ïa ka tnad PWD ba kan shimkhia ban shna noh, kaba katkum u MLA u la ïathuh ba 3 klur tam la mang, nalor ka shi klur ba la mang shuh na ka bynta ban shna ïa kane ka long round road.
U bah Sawkmie u la byrngem lada ka PWD kam shna ne pyndep la ka kamram, un shna hi noh ïa kane ka surok kaba la sniew shaba palat kaba un mang na ka MLA skhim jong u na ka bynta ka bha ka miat ki paidbah ka thaiñ, khnang ba kin suk ka leit ka wan. Kumba u ju ïai kyrpad mynta ruh u kyrpad ïa ki paidbah ba kin ïai shah sa shi por, ar por, shen ka leit ka wan kan sa suk.
Kumjuh na ka liang u Excutive Engineer ka PWD u Bah C Kharmudai, u la pynpaw ba ki la dep ai ïa ka work order, la kumba ar snem mynta, hynrei kim pat ïoh ban shna ba hap ap banda dep ki kam ka PHE kaba ki la pyntrei.U pynpaw ba kim kwah, ynda la dep shna ka PWD yn tih biang pat da ka PHE, kumta ki ap haduh banda dep syndon ki jingshna ka PHE.
Halor ka surok ar laiñ (two lane) ha Mawroh ter ter shaduh Mawlai Bye pass, u bah Kharmudai u la ong ba ka jingslem ka dei na ka jingshim jaka namarba ki pynheh ïa ka surok na ka shi laiñ sha ka ar laiñ, kumta ka kham por.
Shuh shuh ha ka ba ïa dei bad ka jingkynnoh u MLA ba trei katba mon ïa ka surok ha Mawroh, u ong ba ka surok kam pat dep ki dang shna bad haba pyntrei ki don beit ki jingduna.U ong ruh ba shuwa ban siang rong kin khmih bniah biang ba kan ym long kumta, hynrei kin shna hok.
