Ap shrip ki Pulit ha Mawlai Bypass ïoh kem arngut ki mynder Bangladeshi

Shillong, Naitung, 10: Ki Pulit ka East Khasi Hills kiba la ïoh ïa ka jingtip kaba bniah na ki tnat syntiat jong ka tnat shipai Border Security Force (BSF) ha ka 8 tarik, Naitung, 2025 ki la ïoh kem ïa ki arngut ki mynder Bangladeshi uwei u shynrang bad kawei ka kynthei kiba wan rung tuh shapoh u pud u sam jong ka ri India.

Ha u kyrwoh ba la phah da ka tnat shipai BSF ha ka sngi Palei la pyntip ba ki Pulit ki la ïoh bat ïa kawei ka kali Alto kaba don ïa u nombar ML10-4104 ha surok Mawlai Bypass, Shillong bad ha ka jingtohkit la lap ba ki arngut ki mynder Bangladeshi ki dang thmu ban leit phai sha Bangladesh da ka jingïarap jong ki ar ngut ki nong India.

Ïa ki arngut ki mynder Bangladeshi bad ïa ki arngut ki nong India lah rah noh da ki Pulit sha thanat ban pynlong shuh shuh ïa ka jingtohkit kaba bniah.