Shillong, Lber 27:Ka Harijan Panchayat Committee (HPC) kala pynpaw ba ka dang ap mynta ïa ka Sorkar Jylla ba kan khot ïakren halor ka jingdonkam ban pynbeit ïa ki kam ki jam ba ïadei bad ka jingpynkynriah ïa ka Them Metor na Them Iew Mawlong.
“Hooid, ngi kwah ban ïakren bad ka Sorkar Jylla namar ngi kum kiba iadonbynta ha kane ka kam, ngi don ïa ka hok. Ngi dang ap mynta ïa ka Sorkar ban buh ïa ka tarik jong ka jingïalang” ong u Gurjit Singh, Secretary ka Harijan Panchayat Committee.
U Gurjit Singh ula kubur ruh ba ka Harijan Panchayat Committee kala phaikhmat mynta sha ka lynti ban lah ïa pynbeit noh ïa kane ka kam.
Ka HPC kala pyntip ruh ïa kane ka jingkwah jong ka hakhmat ka Ïingkashari Meghalaya High Court kaba dang shong bishar ïa ka mudui jong ka Committee pyrshah ïa ki sienjam bala shim da ka Sorkar Jylla ban pynkynriah ïa ka Them Metor na Them Iew Mawlong.
Kane kala mih ruh hadien ba u Symbud Myntri Rangbah ka Jylla Bah Prestone Tynsong ula pyntip ba ka Sorkar Jylla kala pdiang sngewbha ïa ka rai jong ka HPC bad ba ka long ba kloi ban iashong ïakren noh naba ka jingpynkynriah ka dei beit ban jia.
Ha ka 9 tarik Lber, ka Division Bench jong ka Ïingkashari Meghalaya High Court ba kynthup ïa u Chief Justice Sanjib Banerjee bad u Justice W Diengdoh kala ong haka hukum “Naba ka nongujor kala pynpaw ba ka kwah ban ïa kren ha kaban ai jaka ha kaban pynkynriah ïa ka Them Metor, bad ba kane ka kam ka dang don ha ka jingbishar jong ka Sorkar, la pynjlan noh ïa ka jingbishar ban ailad ïa ka jingïapynbeit”.
Haba kylli ïa ka jaka ba ki tyrwa ban pynkynriah ïa ka Them Metor, u Gurjit Singh ula ong “Nyngkong eh ngin ïakren halor ka jingtyrwa ba mih na ka Sorkar. Ngin hap ïakren ïa kane ka kam bad ki para jait jong ngi bad ngin sa pyntip ïa ka rai sha ka Sorkar Jylla”.
Haba kylli la ki Harijan ki longba kloi ban kynriah noh, une u Nongïalam ka HPC ula ong ba ki (Harijan) la kwah ban ïapynbeit noh ïa ka kam.
“Kumba nga ong, ngin sa ïakren shuwa bad ka Sorkar. Ngin sa peit ïa kaei kaba ka sorkar ka pyrkhat halor jong ngi bad ngin sa kren ïala ki briew jong ngi bad lada ki mynjur, ngin sa ïaid kat kum ka jingtyrwa ka Sorkar” ula ong haba bynrap “Ka High Level Comittee ha ka kaiphod ka khlemkren eiei halor kano kano ka jingtyrwa lane ithuh ïa ka jaka kaban pynsah ïa ngi”.
U Gurjit Singh ula pynpaw ba ka Sorkar Jylla ka dei ban kdew ïa ka jaka bala ithuh ban pynkynriah ïa ki paid Harijan ne Them Iew Mawlong.
