Ap khmih lynti ki paidbah ka thaiñ khappud ban pyntreinoh ïa ka surok Borghat-Sonapur

Khliehriat jylliew 10: Ki paidbah ha ki thaiñ khappud ki dang ap khmih lynti lano ka sorkar kan pyllai noh ïa ka work order kaba iadei bad ka jingpyntrei ïa ka surok ha khappud ka surok kaba naduh Borghat shaduh Sonapur Road kaba 39.594 kilo mitar kaba la dep pyllait tender naduh ka 3 tarik u rymphang 2022.
Kane ka surok ha khappud ka dei kaba la aiti ha ha ka NERSDS ba kynthup ruh haduh saw snem kynthi ba ka NERSDS ka hap ban peit bad pynbit pynbiang ïa katei ka surok Borghat-Sonapur. Ki thymmei khubor ki iathuh ba hadien ba la dep pyllait tender, na ka liang ka ophis jong u Executive Engineer Public Works (Road) NEC Branch Shillong mynta ka la pan por biang haduh ka taiew ba khatduh jong une u bnai jylliew 2022 ban buh maw nongrim ha shnong Huroi bad ban pynmih ïa ka work order ban pyntrei noh ïa katei ka surok kaba ha ka mang tyngka T 120 klur tyngka.
Dang myn ha ka taïew ba la dep ka la don ka jingong bad ka jingrai na ki katto katne tylli ki shnong na khappud ba kin nym treh ban ïa shim bynta ha ka jingthep vote jong ki ha ka Assembly Election ka ban sa long ha u snem 2023 bad ki angnud ruh ba la kumno kumno ka tnat PWD (Roads) ka dei ban sdang noh ban pyntrei ha une u snem 2022 hi lym kumta kin nym treh ban shimbynta ha ka election 2023. Ha kaba iakren bad ki nongshong shnong jong ka thaiñ khappud ki la pynpaw ruh ïa ka jingkynduh jingeh jong ki ha ka leit ka wan khamtam ha kum kine ki por ba dei ka aiom slap ha kaba kiba bun ki lynti syngkien ki la dap da ka jyrsieh bad don bun ki jaka ruh kiba twa ki maw, twa ki khyndew kiba kah lynti ïa ki kali kiba iaid ha kitei ki thaiñ naduh Borghat, Huroi, Hingaria ter ter shaduh Sonapur.