Ap ka sorkar jylla ban pdiang ka Civil Aviation ïa ka kaiphod pynheh kad liengsuiñ Shillong

Shillong, Risaw 25 : U Symbud Myntri Rangbah ba khmih ia ka Tnad Transport u Ma Sniawbhalang Dhar ha ka sngi Thohdieng, ula ïathuh ba ka Sorkar Jylla ka dang ap ïa ka tnad Civil Avition jongka Sorkar Pdeng ban pdiang ïa ka kaiphod ban pynheh ïa ka kad liengsuiñ Shillong kaba ha Umroi bad ka tang shu aidak ba la biang yn sa sdang ban thied jaka biang naka bynta kane ka kam namar ka kam thied jaka ka dei ban pynlut da ka sorkar jylla katba ïa kiwei kiwei ki kam ban pynheh ïa ka kadliengsuiñ yn sa pynlut da ka sorkar pdeng.
Haba ïakren bad ki nongthoh khubor, u Ma Sniawbha ula ong “Tad hadien ba ngi la ïoh dak na ka Sorkar India, ngin sa lah ban sdang ïa ka jingthied jaka”.
U pyntip ba ka Airport Authority of India (AAI) kala pynpaw ba ka donkam sa kumba 16-17 acre ka jaka na ka bynta ban pynheh ïa ka runway bad ki jaka ki ban ai jingshngaiñ.
U pyntip ba ka Sorkar kan sa ïakren shen ïa kane ka kam bad u Myntri ka Ministry of Civil Aviation.
“Ngi la pan por ban ïakynduh ïa u Myntri ka tnad Civil Aviation. Ngi kwah ban khot ïa u ban wan sha Shillong bad lada u mynjur, ngin leit ban khmih hi sha Umroi-kane ka dei ka jingkyrpad jong ngi na ka Sorkar Jylla” ula ong.
Haba kylli, u Symbud Myntri Rangbah ula ong “U Consultant ula aiti ïa ka kaiphod ba pynpaw ba ka lynti ka don ban pynheh ïa ka kad liengsuiñ hynrei ki don katto katne ki bynta kiba hap kyrpad ïa ka Sorkar Pdeng ban pyllait noh. Na kata ka daw ngi donkam ban ïakynduh ïa ka Sorkar pdeng sa shisien. Lada ka pyllait, nga tharai ngin sa lah ban shim ïa ka rai”.
Kat kum ka jingong jong u, ka jingthied jaka ka dei ka kam kaba hap leh da ka Sorkar Jylla hynrei ïa ki jingtei yn hap ban leh da ka Sorkar Pdeng. Ula ong ba kam don satia ka jingduna pisa ban pynheh ïa ka kad liengsuiñ.