Ap ka sorkar ïa ka kaiphod na ka Committee halor ka jingujor u nong Assam sha ka ïing bishar SC

Shillong, Nailur 24 : Ka Sorkar Jylla ka dang ap ïa ka kaiphod jong ka Expert Committee hashuwa ba kan shim ïa kano kano ka sienjam halor ka jingujor u nong Assam u Jitul Deka ba ki jaka naduh Byrnihat haduh Killing ki hap hapoh ka khlaw sorkar bad kynnoh ruh ïa ka jingkyntur ka University of Science and Technology Meghalaya (USTM) sha ka jaka khlaw.
La bthah ïa ka Expert Committee bala khlieh da u Addl Deputy Commissioner ka Ri-Bhoi bad kynthup ïa ki dkhot na ka Pollution Control Board, Mining & Geology bad bor District, ba kan aiti ïa ka kaiphod jingtohkit hapoh ka 15 tarik u Risaw.
Ka kamram jong ka Committee ka long ban leit jurip ïa ka jaka bad ai ïa ka kaiphod ba bniah halor ka jingkynnoh utei u Deka bad kynnoh kyntur sha ki jaka khlaw da ka USTM.
“To ngin ap bad peit ïa ka kaiphod bad hadien ba ngi ïoh ïa ka kaiphod ngin sa lah ban ïathuh ïa phi ïa kiei ki kam ba ngi na ka Sorkar Jylla ngin leh” ong u Symbud Myntri Rangbah Bah Prestone Tynsong haba ïakren bad ki lad pathai khubor ha ka sngi Balang.
Ula pynpaw ruh ban phikir bha pyrshah ïa ka jingshim rai kyrkieh, da kaba pynpaw ba ka jingrai ban shu khang khyrdep ïa kiei kiei khlem da shong bishar bha kan dei ka kam kaba bakla.
“Hynrei nga sngew shimet ba lada phi shu kren matlah ba phi hap ban khangdam ïa kiei kiei baroh, nga sngew ba ka dei ka bym dei satia” ong u Bah Prestone.
ïa ka Expert Committee la thung hadien ka kaiphod jong ka Central Empowered Committee bala thung da ka Iingkashari Supreme Court, kaba la ai jingmut ban daiñ kuna haduh 150 klur tyngka ïa ka USTM namar ka jingpyndonkam ïa ka jaka khlaw khlem da ïoh ïa ki jingbit.
Ka kaiphod CEC ka pynpaw ruh ba ka USTM kala kyntur ïa ka jaka ba jan kot 25 hectare ba long khlaw ha Ri-bhoi District, kaba pynkheiñ ïa ka Forest Conservation Act, 1980.