Jowai, Ïaïong 28: Ka Jaiñtia Student Union (JSU) Syndai Unit hapoh ka jingïalam u General Secretary ka seng u samla Heiplanmiki Tariang ryngkat u Organising Secretary samla Control Suliang lem bad ki katto katne ngut ki dkhot kila leit buh da ka dorkhas ha ophis treikam u Assistance Executive Engineer MePDCL Amlarem Sub-Division bad dawa mardor ban shna thymmai ïa ki Post light bala sniew kiba don ha ka Shnong Syndai West Jaiñtia Hills.
La ïathuh kumba long mynta kine ki Post light kila sarang lut bad don ruh kiba la jan kyllon kiba ap jingma pynban ïa ki paid nongshong shnong khamtam ïa ki thliew ïing kiba don marjan bad kine ki post light, sa kawei ruh ba ka dei ka por lyiur ba jur u slap ka lyer ki lah ban kyllon ha kino kino ki por.
Na ka liang ka seng ka dawa mardor ïa ka Ophis trei kam jong u Assistant Executive Engineer ban leh mardor ïa kaba don kam khnang ban lait na kino kino ki jingjia ba sngewsih.
