Shillong, Rymphang 19: Watla ka Nangkiew Irat SC ka la don hapdeng ka jingartatien ha ki khyndiat minit ba khatduh ha ka jingïakhun pyrshah ïa ka Nongthymmai SC hynrei ka la ïoh pat ban khur ïa ka jingjop da 2-1 kol haka OC Blue Shillong Premier League 2024 ha madan First Ground – SSA Stadium, Polo, hynne ka sngi Balang.
Ka kol ba la kum thep hi ha ka minit ba 49 bad kawei na u Banraplang Nongsteng (78′) ka la buh ïa ka Nangkiew Irat ban lamkhmat 2 kol shuwa ka jingbakla jong u rangapkol, u Surjay Kumar Pariyar kaba la ailad ïa ka Nongthymmai lyngba u Mowell Chyne (87′) ban pynphai shi kol. Watla u Surjay u la bakla shisien, hynrei u la lah pat ban khanglad ïa ka penalty jong u Donboklang Majaw ha ka khyllipmat shuwa ban kut ka por.
Ha ka por ba kine ki arliang ki ïakynduh pyrshah ha ka 1st leg, ka Nangkiew Irat ka la wanphai nadien ban jop ïa ka jingïalehkai da 4-2 kol ha ka 06 tarik Nohprah.
Ka resol hynne ka sngi Balang ka mut ba ka Nangkiew Irat ka la ïoh ban kamai 19 poiñ hynrei kam shym la lah satia ban kyntiew ïa ka kyrdan jong ka ha ka miej – ka dang ïaineh sah ha ka kyrdan ba hynriew.
Ka jingma ka ap ïa ka Nongthymmai ha kaba ka dang ïaineh ha ka kyrdan ba khyndai ha ka miej bad ka dang sah sa lai tylli ki jingïalehkai kiba ka hap ban ïakhun tyngeh ban pyrshang pyllait ïalade na ka thup kyrdan shah sloit (relegation zone), watla ar tylli na kine ki dei pyrshah ïa ki kynhun kiba don ha ka Top 3.
ïa ka kol thep hi da ka Nongthymmai kadei kaba la kum bakla u rangapkol jong ka, u Akash Thapa. U la trei shitom ban khanglad ïa ka jingpyrshang jong u Shaibor Nongrum shuwa hynrei ka jingbym biang por jong u ha ka por ba u thmu ban kura pynkiar sharud ïa ka bol na ka corner, ka la pynlong ïa ka bol ban rung sha kol lajong.
Da kaba buh ïa ka jingbakla shadien, u Akash u la lah ban khanglad ïa u Wallamsuk Nongkhlaw hadien khyndiat minit hynrei u khlem shym la lah satia ban ïada ïa ka kol kaba ar. U Surjay u la pashat ïa ka bol shajrong sha liang kadiang na bynta u Gobindash Singh uba la pyllait lyngba arngut ki rangapdien ka liang pyrshah, watla u la don hapoh phyllaw kol, hynrei u la pashat ïa ka bol sha u Banraplang ba un pynkhih ïa ka kol ba nyngkong jong u mynta ka samoi.
Katba ka por ka la nang jan ban jam sha kaba kut, ka Nangkiew Irat ka la dei ban sngewskhem hynrei ka jingbakla jong u Surjay ka la pynlong ïa ka Nongthymmai ban ïoh mynsiem biang. Kane ka la jia ha ka por ba u Surjay u la buh ïa ka bol ha madan hadien ba ïoh kem ïa ka, khlem da tip ïa u rangïalehaki ka liang pyrshah, u Mowell ba u dang don hadien. Kane ka la ailad ïa utei u rangïalehkai ka Nongthymmai ban knieh ïa ka bol bad thep suk jlang sha kol.
Watla katta u Surjay u la lah pat ban pyllait im ïa ka kynhun, da kaba khanglad ïa ka penalty ba la shut da u Donboklang, kaba la ai sha ka Nongthymmai hadien ba u Thymmaibor Mukhim u la shah pynur hapoh ka synduk phyllaw kol.
ïa kane ka jingïalehkai la khmih bad pynïaid da ki official kynthei, ba kynthup ïa ka Luckymerry Lyngdoh kum ka referee, arngut ki assistant bad ka official ba saw.
Ka jingïalehkai mynta ka sngi ka Nongrim Hills SC kaba wan ha ka kyrdan ba 8 kan ïakhun pyrshah ïa ka Shillong Lajong FC kaba wan ha ka kyrdan ba ar ha ka por 3 baje janmiet. Ka Lajong ka la jop ïa ka 1st Leg da 1-0 kol ha ka 06 tarik Kyllalyngkot.
