Nongstoiñ, Lber 22: Ka Hynñiewtrep Youths Council Lai Lyngdoh Circle, hapoh ka jingïalam u Samla Wandappynkmen Marweiñ President bad samla Banlam Lyngkhoi President Mawkaton Unit ryngkat ki dkhot ha ka jingsynran u samla Lumlang Kharsyiemlieh President HYC West Khasi Hills District, mynta ka sngi ka la leit ai jingthoh bad ïa kynduh ïa u EE PWD Road Nongstoiñ West Khasi Hills District, ban maramot bad shna noh kloi ïa ka jingkieng kaba don ha shnong Umlipoi, kaba la jot bad dkut ki dieng jingkieng bad jan ha.
Watla u EE um don hynrei haba ïakynduh ïa u SDO Bah C.Kharraswai, u la kular ban lehkloi bad phah maramot noh naduh lashai. Ka HYC ka pynpaw ka jingsngewnguh ïa ka office PWD ban ka la shimkhia ban sngap leh ïa ka jingeh kaba ka seng ka pynpaw na ka bynta ki paitbah ka thaiñ Lai Lyngdoh.
Na ka liang ka seng ka la maham ïa ki kali heh ba kim dei leh katba mon, hynrei ki dei ban burom ïa ki aiñ ka Sorkar ban nym kit palat put namar kan ktah ïa ka thaiñ lada jot kumne ki jingkieng.
