Shillong, Nailur 23 : U Vice President jong ka AITC bad MLA jong ka Rangsakona, u Zenith Sangma u la dawa ba ka sorkar Meghalaya Democratic Alliance ba kadei ban pynshai lut halor ki jingkynnoh don jyrsieh ha ka tnad Meghalaya Energy Corporation Limited (MeECL).
“U Myntri Rangbah bad Symbud Myntri Rangbah ki dei ban pynshai lut halor kine khlem buhteng,” ong u Zenith Sangma ha ka kyrwoh khubor ha kane ka sngi Thohdieng.
U kynnoh ruh ba ka sorkar MDA hapoh ka jingïalam jong u Conrad K Sangma kum u Myntri Rangbah ka la pawnam ha ki kam bamsap ba harukom. Katkum ka jingong jong u, ka BJP, UDP bad kiwei ki seng riewlum ki shaniah bad kyrshan ïa ka sorkar NPP ban lute ïa ka pisa paidbah.
“Ki don bynta lang, ki lah ban kyntait hynrei kadei pat ka jingshisha kaba la paw,” bynrap biang u MLA.
Da kaba kam ba ka jinglong jingman jong katei ka tnad kam long shuh kaba itynnad, u Zenith u la ong ba ïa katei ka ishu u la rah man ka por da kaba maham ba kan sa poi ha ka dap ram bad mynta ka la poi.
U la pynkynmaw ruh ïa ka jubab jong ka sorkar ha ka dorbar ba la dep ba ka jinglut jingsep man u bnai jong ka MeEcl ka long 135 klur katba ka jingmih pat ka long tang 71 klur tyngka.
“Mano ban bei ïa ka pisa kaba duna kaba kot 75 klur tyngka man u bnai bad 900 klur man u snem?” u la buh jingkylli.
U ong ruh ba nalor ka jingshim ram kawei hadien kawei ka ram ka pisa ka la poi mynta haduh 617 klur tyngka ka pisa padibah kaba la shu tuid kai ha kane ka Corporation. U ong ruh ba ka MeECL kam lah shan shuh mynta dalade ïalade ruh. “Kumta ngi kwah ka jubab na ka sorkar ba balei kam don ïa ka plan kaba biang. Dei ban jubab ïa ki paidbah ka jylla balei ïa ka bording la thied ha ka dor kaba rem kata haduh 12tyngka shi unit na ka bynta ka jingmyntoi jongno, kata ruh khlem ka jingmyntoi jong ka MSERC? Kane ka sorkar kadei ban jubab ïa ki paidbah,” u la ong.
U ong ruh ba kawei pat ka jingdkoh ka rukom treikam kadei halor ka UGO billing system lyngba ka software kaba la ai sha kawei ka kompeni khlem da khot kano kano ka tender, la kynnoh shuh shuh utei u heh ka AITC.
