Shillong, Nailar 02: Ka Kshaid Kynrem ha Riwar Sohra- Shella, kadei kawei na ki Kshaid ba pawnam ha ka jylla bad wat ha ri India. Kadei ruh kawei na ki jaka jngohkai kaba ki briew na kylleng ki poi sha kane ka Kshaid ban wan peitkai, khamtam eh ha ka por ba jur slap, ha kaba ka Kshaid ka noh shaduh sha shiliang ka surok.
Hynrei mynta kane ka Kshaid bad ka jaka jngohkai ka don hapdeng ka jingma ba ka lah ban duh noh ïa ka jongitynnad ba ka jingithiang jong ka. Ka daw ka long ba ha kane ka Kshaid ka la don ka jingtih maw kaba jur da ki kor ki bor kiba heh ha syndah jong kane ka Kshaid.
Ki dur ki dar bad ki video kiba la pynmih da ki katto katne ki riew ieit mariang ha Social Media, ïa kaba la phah ruh sha ki lad pathai khubor, ka pyni ba kane ka jaka ba tih maw ka don ha syndah jong kane ka Kshaid bad ka dei ka jaka ruh kaba long khlaw, ha kaba ki don ki dieng ki siej sawdong jong ka.
Kiba bun ki briew, khamtam kito kiba sngewkhia halor ka jingitynnad jong kane ka Kshaid bad kumjuh ruh ka jingjyrngam bad jinglong sotti ka mariang sawdong jong ka, ki la pynpaw ka jingsngewkhia kaba jur ïa kane ka jingtih maw na kane ka jaka.
Haba la pyrshang ban wad bniah ïa kane ka jingtih na kane ka jaka, ym shym la ïoh jingtip kaba janai, hynrei la don kiba ïathuh ba ka jingtih maw nangne kadei kaba la shalan sha Bangladesh.
