Nongstoiñ, Nailur 11: Ka Ophis u District Magistrate, West Khasi Hills District Nongstoiñ, ka la pynmih ar tylli ki hukum hapoh Section 163 jong ka Bharatiya Nagarik Suraksha Sanhita (BNSS) 2023, ha kaba ïadei bad ka jingdonkam kyrkieh ban ïada ïa ka ïaid ka ieng ki paidbah paidbah ha ki ar tylli ki jingkieng kiba don hapoh ka District.
Ka hukum kaba nyngkong ka dei halor ka jingkieng No. 3/1 (Span 8.0M) kaba don ha CH: 2.750 km jong ka surok Umlieh-Nongriat, kaba katkum ka jingtip na u Executive Engineer, PWD (Roads) Nongstoiñ Division, ka la sdang ban jingjot ha kawei na ki slab jong ka jingkieng, namar ka rta bad ruh na ka jingïaid barabor jong ki kali heh kiba kit palat pud.
Ka hukum kaba ar ka ïadei bad ka jingkiengrit kaba don ha CH: 4+500 km jong ka surok PMGSY-II “MRL 34-Urkali-Tiehbah sha Nongkhñiang (L-6.75 Km)”, ha kaba la lap ba ki kali heh kiba palat pud ki dang ïaid lyngba kata ka jingkieng rit, katba ym don ka jaka na ka bynta ban tei thymmai. Kane ka buh jingma ïa ka jinglong jingman jong ka surok bad lah ruh ban wanrah jingjia ba sngewsih lada ym lah ban teh lakam.
Kumta, ban lait na ka jingpynjot shuh shuh bad ban ïada na kino kino ki jingjia ba sngewsih, u District Magistrate Bah Garod L.S.N. Dykes, IAS, u la pyrkhing ïa ka jingïaid jong ki kali kiba palat 9.00 MT naduh mynta bad pyntreikam ïa ka kyndon 163 jong ka Bharatiya Nagarik Suraksha Sanhita (BNSS) 2023.
Namar ka jingdonkam kyrkieh, la pynmih ïa kane ka hukum na ka bynta ka jingshngaiñ ka ïaid ka ieng jong ki paidbah, ban ïada na ki jingjia bym poi pyrkhat. La kyntu ïa baroh ban bud ryntih ïa kane ka hukum bad kiba ïaleh pyrshah kin ngat ha ka kyndon kiba tyngeh jong ka aiñ.
