Shillong, Jymmang 10 : U Symbud Myntri Rangbah ka jylla, Bah Prestone Tynsong u la ong ba ka sorkar jylla kan bishar sani bha ym ban shu leh kyrkieh haba ïadei bad ka ishu them-metor.
Ïa kane u kren haba pynshai halor ka jingdawa jong ka Hynñiewtrep Youth Council (HYC) ba ka sorkar kam dei satia ban patiaw ïa ka jingdawa bad ki kyndon ba bun ba la buh da ka Harijan Panchayat Committee ha ka jingïakynduh ïa u ha ka janmiet sngi Nyngkong.
“Nga sngew ba kim dei ban ong ei ei palat ïa kata katba ka jingïakren kam pat poi sha kaba kut. Ngi don na ka sorkar, kumta ngim lah ban leh kano kano kaba long pyrshah ïa la ki nongshong shnong ka jylla. Kata kadei kaba shai bha na ka liang jongngi,” ong u Bah Prestone haba kren bad ki lad pathai khubor hadien ba la wai ka jingïalang jong ka NPP ha Nongthymmai.
Nalorkata, u ong ruh ba u la dep ban kren da kaba shai ba donkam ban ap haduh ban da dep ka jingïakynduh kaba khatduh bad ka HPC ha shwa ban shim ïa kano kano ka rai. “Mynta ngi dang pynkhreh ïa ka blueprint bad ïa kane yn sa phah sha ka HPC bad hadien kata, ka sorkar kan sa khot ïa kren biang ïa ki. Hadien kata ngin sa lah ban ong kaei ngin leh,” u la bynrap biang.
Kumban shu kdew hangne, ka HYC ha ka sngi Nyngkong ka la ong ba lada katei ka jaka ha them-metor kadei kaba la shim da ka sorkar kumta na ka liang kito kiba sah hangtei kim don hok ban kam kum ki trai jaka bad dawa ruh ban ai jaka bujli ïa ki.
