Shillong, Risaw, 19: U President ka All Meghalaya Karbi Association (AMKA) bad ki nongïalam ka Hill Farmers Union (HFU) Central Body ki la pynpaw ïa ka jingangnud ban ïohi ba ka shongsuk shongsain kan wan phai biang ha ka shnong Lapangap khnang ba ki nongrep kin ïoh ban leit ot noh ïa u kba uba la ih.
Kine ki ar tylli ki kynhun ki la pynpaw ïa kane ka jingangnud ha ka jingïalang kaba la long hapdeng u President jong ka All Meghalaya Karbi Association (AMKA) u Robert Ronghang bad ki nongrep ha ka shnong Sohliya ha ryngkat ka jingïadon lang u General Secretary ka Hill Farmers Union (HFU) Central Body Bah Allfondbirth Kharsyntiew bad ki dkhot.
Ha ka jingïalang ki nongrep bad ki nongïalam ki la pynlong ruh ïa ka jingsngap jar kaba shi minit halor ka jingkhlad noh jong uwei u nongrep uba la tip kyrteng kum u Oriwell Timu na ka shnong Tahpat, Karbi Anglong ha ka jingïakynad ba la jia dang shen ha khappud ka shnong Lapangap bad ka shnong Tahpat. Ha kane ka sngi, ki ki nongrep bad ki nongïalam jong ki ar tylli ki kynhun ki la kynshew pisa kat kaba ki lah ban pynmih na ka bynta ban phah kum ka dak jong ka jingsngew lem sha ki bahaiing hasem jong u Oriwell Timu.
Ka AMKA bad ka HFU ki la shim ruh ïa ka rai ban phah ïa ka khubor ba ki nongrep na Karbi, Assam bad na Lapangap, Meghalaya ki dei ban ïakren ïasuk khnang ba ki nongrep kin ïoh ban leit ot noh ïa u kba uba la ih.
“Ngi ngeit ba ki nongrep kin don ka mynsiem ka jingïamab bad ban wanrah biang ïa ka shongsuk shong sain kumba ngi ju im lang baroh shikatta naduh 100snem mynshwa,” la ong u Presdient ka AMKA.
U Bah Allfondbirth u la pynpaw ka jingsngewkmen bad ai khublei ïa u President ka AMKA bad u la pynpaw ruh ïa ka jingkyrmen ba kane ka jingkynduh kan wanrah ïa u soh jong ka jingjop khnang ban dup lah ban pynkut noh ïa ka jingïakynad hapdeng ki nongrep Khasi Pnar ha ka shnong Lapangap bad ki nongrep Karbi ha ka shnong Tahpat.
