Angnud u Modi ba ki nonghikai kin hikai shaphang ki khana tynrai ha ka ktien lajong
Shillong, Nailur 06: U Myntri Rangbah Duh, Narendra Modi u la ïakren bad ki nonghikai kiba la ïoh ïa ki khusnam National Teachers Awards ha ka ïingsah jong u ha 7, Lok Kalyan Marg mynta ka sngi.
Ki nongjop ki la batai ïa ki jingshem jong ki ha ki kam hikai ïa u Myntri Rangbah Duh bad ruh ki rukom treikam ba saiñdur thymmai ba ki pyndonkam ban kham pynsngewtynnad ïa ka jingïoh jinghikai. Ki la pyni ïa ki nuksa jong ki kam jong ki ha ka imlang sahlang ha ryngkat ka kam hikai jong ki. Ha ka jingïakren bad ki, u Myntri Rangbah Duh u la ïaroh ïa ka jingtrei shitom jong ki ha kane ka kam ai jinghikai bad ka jingshitrhem jong ki ha kine ki snem ba la dep, ïa kaba la ai jingithuh lyngba kine ki khusnam ba ki la ïoh.
U Myntri Rangbah Duh u la kren shaphang ka jingktah jong ka NEP bad ruh ka jingdonkam ban ïoh ïa ka jinghikai ha ka ktien lajong. U la ai jingmut ïa ki nonghikai ba kin hikai shaphang ki khana tynrai ha ki ktien la jong ban ïarap ïa ki ba kin ïohsngew ïa ki ktien bapher bapher bad khnang ba ki khynnah kin nang ïa ki ktien bapher bapher bad sngewthuh ïa ka jingïar ka deiriti jong ka India.
U Myntri Rangbah Duh u la ong ba ki nonghikai ki lah ban ïalam ïa kiba shah hikai ha ki jingleit ban ïoh jingnang jingstad bad ban leit peit ïa ka jingïar jong ka India. U la ong ba kane kan kyntiew ruh ïa ka kam jngohkai bad ïarap ïa ka ïoh ka kot ha ki jaka ba ki leit.
U Myntri Rangbah Duh u la ong ba ki nonghikai ba jop khusnam ki dei ban ïatreilang lyngba ka social media bad ïasam ïa ki rukom treikam ba seisoh tam jong ki khnang ba baroh ki lah ban ïoh jingnang jingstad bad ïoh jingmyntoi na kine ki rukom treikam.
U Myntri Rangbah Duh u la ong ba ki nonghikai ki ai ka jingshakri kaba kongsan ïa ka ri bad ba ka jingbahkhlieh ban pynkhreh ïa ki samla mynta na ka bynta ka Viksit Bharat ka don ha ka kti jong ki nonghikai.
Ka thong jong ka jingai khusnam National Teachers Awards ka dei ban rakhe bad burom ïa ka jingnoh synniang jong ki nonghikai ba tbit tam ha ka ri kiba trei shitom ha ka rukom kaba la kyntiew ïa ka kam pule puthi bad wanrah jingmyntoi ha ka jingim jong ki shah hikai jong ki. 82 ngut ki nonghikai na kylleng ka ri ki la shah jied ban ïoh ïa kine ki khusnam mynta u snem kiba kynthup 50 ngut ki nonghikai kiba la shah jied da ka Tnad School Education & Literacy, 16 ngut ki nonghikai da ka Tnad Higher Education bad 16 ngut ki nonghikai da ka Tnad Skill Development and Entrepreneurship.