Nongstoiñ, K’Lyngkot 18: Ka shnong Marskuiñ bad ka shnong Jaidoh ki dei ki shnong ba marjan ba la pynïakhlad da ka wah Kynshi hynrei haduh mynta ym pat don ka surok kali kaba pynïasoh ïa kitei ki artylli ki shnong wat la ka jingjngai na kawei sha kawei pat ka don tang kumba lai kilomitar ei ei.
Namar ka jingbym pat don surok u bah L.Dkhar uwei na ki nongshong shnong jong ka Marskuiñ haba ïakren bad u nongthoh khubor u la ong ba ka surok ban leit sha Nongstoiñ ka dei kaba ïasoh bad ka surok Nongstoiñ kaba jngai kumba san kilomitar tam ka ïasoh bad ka surok Nongstoiñ – Wahkaji hajan ka shnong Rangblang bad ki hap ban hiar sha Nonglwai, Nongkynjang kaba ka jingjngai haduh Kynroh ka la poi kumba 11 kilomitar hynrei lada don ka surok kaba pynïasoh bad ka surok na Kynroh sha Nongkasen ka jingjngai na Marskuiñ haduh Kynroh ka long tang kumba hynriew kilomitar ei ei.
U bah Dkhar u la ong ruh ba ka jing jngai ka surok ka ktah haduh katta katta ïa ka bai leit bai wan jong ki paitbah nongshong shnong .
Nalor kata u la ong ruh ba lajan baroh ki nongshong shnong ki dei kiba im ha ka rep ka riang bad ki ju shalan ïa ki mar rep jong ki sha Nongstoiñ bad kiwei kiwei ki jaka kumta ka jingjngai jong ka surok ka ktah ruh ïa ka bai kit bai bah ïa ki mar rep na katei ka shnong bad kiwei pat ki shnong ba mar jan.
Utei u rangbah u la ong ruh ba ha ki snem ba mysnhuwa ka sorkar ka la mut ban tih surok ban pynïasoh ïa ka shnong Marskuiñ bad Jaidoh hynrei ym lah ban tip balei ba ka sorkar ka la shu sngap mynthi halor katei ka jingthmu.Kumta u la kyntu ïa ki bor sorkar ba ki dei ban phai khmat lem sha katei ka thaiñ khnang ba kan ym ktah than ï ka jinglut jingsep ha ka bai leit bai wan bad ka kit ka bah.
