Nongstoiñ, Ïaïong 03: Hadien ka jingrung NPP jong u MDC ka Rambrai ha u bnai Nailur jong u snem ba la lah, ki paidbah ki la pynpaw ka jingkyrmen ba ka surok na Mawrok sha Nonglang kan urlong noh. Nangta ka surok na Kyrshai sha Langpih ruh kan urlong bad kane hi ka dei ka jingkyrkhu sha ki paidbah jong ka Rambrai baroh kawei.
Kiba bun ki riew rangbah ki la ong ba lada ka jingleit rung jong u Bah Lurshai Kharbani MDC shimet sha ka NPP, ka long na ka bynta ba ka sorkar kan kham phai khmat ban leh bha ïa ka constituency. Katno tam lei lei lada u R.G Momin MLA shimet, u ba dei ruh u kthaw kurim jong u Bah Lurshai un leit rung sha ka NPP.
Kum ban pynkynmaw ba ha ka 13 tarik u bnai Nailur jong u snem ba la lah, u bah PrestoneTynsong Symbud Myntri Rangbah ka jylla, u la hiar sha Rambrai ban plie ïa u maw nongrim na ka bynta ban pynbha bad siang rong ïa ka surok kaba 6 kilomitar tam na Mawthungmarwei haduh Phodumbah.
Ha ka jingkren jong u kum u kongsan ha ka jingïalang plie mawnongrim, u la ong ba ka Rambrai Jyrngam constituency ka la donkam bha ban don noh ïa ka surok na Rambrai sha Nonglang ka ban pynïasoh ïa ki Block headquarter. U la ong ruh ba ka tnad PWD jong ka Nongstoiñ Division ka la dei ban phah sorbe kloi lan bad pynkhreh noh ïa ka detail project report jong katei ka surok.
Dei halor katei ka nongrim ba ki paitbah ka thaiñ Rambrai ki la buh jingkylli ba hato ka jingkren jong u Symbud Myntri Rangbah ka jylla kan urlong ne em. Ha kajuh ka por na ka liang ki paitbah ka thaiñ Rambrai ki la ong ba ka surok na Rambrai Mawrok haduh Nonglang, ka dei kaba ki la nagnud la slem bah hynrei haduh mynta ka jingangnud ka la shu kut tang ha ki jingmutdur.
Ki la ong ruh ba lada don ka surok kaba biang naduh Rambrai Mawrok haduh Nonglang, kan pynsuk shibun ïa ki paitbah ha ka leit ka wan, namar haduh mynta ki paitbah na ki thaiñ Rambrai haba ki leit donkam sha Nonglang bad kiwei kiwei ki shnong ha ki thaiñ Muliang, ki hap ban leit sha Nongstoiñ bad hiar sha Rwiang.
Tang na Nongstoiñ haduh Nonglang ka jngai kumba 37 kilomitar bad lada kheiñ naduh Rambrai ka long 52 kilomitar, katba lada don surok na Rambrai shaduh Nonglang ka jingjngai ka long tang kumba 20 haduh 21 kilomitar.
Nalorkata ki la ong ruh ba kaba kham pynsahnud ka long ba, haduh mynta kim pat sngew thikna la ïa ka phase II jong ka surok Nongstoiñ-Rambrai-Kyrshai ka jingpyntrei kan dang slem ne em, namar ka jingpyntrei ha ka wat ba nyngkong ka kut tang ha Mawthir, hynrei kaba sah ka dang don sa kumba sawphew san kilomitar.
Kumta, lehse lada u R.G Momin MLA shimet un leit rung noh sha ka NPP, sa ka surok na Mawdet sha Mawkhiat, Rynñiaw sha Umyiap haduh Langpih bad na Langpih shaduh Kyrshai, kin sa urlong khlem artatien.
Ki paidbah ki da ong ruh ba ki kwah ban ïohi noh shait shait ïa ki kam jingtrei ba u ne u MLA u leh na ka bynta ka Constituency, namar kumba long haduh mynta ym ju da kham sngew khubor eiei aïu u leh ha ki bynta jong ka Rambrai.
