Angnud ki nongïalehkai ka Meghalaya kiba tyngshaiñ ha ka KITG, ban khur takma ha ka National Games ka ban wan

SHILLONG, ïaïong 10: Hadien ba ki la ïoh mad ïa ka jingjop kaba khraw ha ka 1st Khelo India Tribal Games 2026, kaba la long ha Chhattisgarh naduh ka 25 tarik u Lber 2026 haduh ka 03 tarik u ïaïong 2026, ha kaba ka Meghalaya ka la ïoh ban khur 9 tylli ki takma, ki nongïalehkai ka jylla ki la pynpaw ïa ka jingangnud ban nang pynbha shuh shuh ïa ka jingïalehkai jong ki katba ki dang pynkhreh ïalade na ka bynta ka 39th National Games 2027 ka ban long ha Meghalaya.
Kitei ki 9 tylli ki takma ki kynthup ïa 2 tylli ki ksiar bad 7 tylli ki rnong, ha kaba katei ka lympung ka la tynjuh ïa ka jingtbit jong ki ha ki jingïalehkai bapher bapher kynthup ïa ka ïakop-siat khnam (archery), bad kumjuh ha ki jingïalehkai kum ka wrestling, swimming, athletics, bad weightlifting.
U Donkupar L. Shadap na Nongpoh, Ri-Bhoi uba la jop takma ksiar ha ka Compound Men’s Archery jong ka 1st Khelo India Tribal Games, u la pynkynmaw ïa ki sngi jong ka jingtrei shitom bad ki jingïalehkai kiba la seisoh ha kaba khatduh hapoh ka jingpynïaid u head coach, u Mim Bahadur Gurung, bad u Nandkishore kum u compound coach jong u.
“Ka jingsngewtynnad jong nga ïa kane ka jingïalehkai ka la sdang naduh ka rta kaba 5 snem. I pa i ju ïalam ïa nga ban leit peit ïa ki jingïakop siat khnam ha shnong jong ngi. Nga la peit ïa ki nongïalehkai Olympic ba ki ïashim bynta ha ki jingïakop siat khnam, bad ka jingkwah ban shim ïa kane ka jingïalehkai ka la sdang hapoh jong nga,” la ong u Donkupar.
Shuh shuh u la bynrap, “Nga ai khublei ïa u Myntri Rangbah, u Conrad K. Sangma, uba la pynbha ïa kane ka jingïalehkai ïakop siat khnam (Archery). Ki tiar siat khnam ki long kiba rem dor bha, ki shongdor kumba 3 lak tyngka, hynrei ngi la lah ban pyntbit ïalade da kaba pyndonkam da ki tiar first-class lyngba ka jingkyrshan ba la ai da u Myntri Rangbah ka Jylla, kaba ym shym la don mynshuwa. Nga shim ruh ïa kane ka kabu ban ai khublei ïa ki coach jong nga bad ïa ka Archery Association of Meghalaya.”
Nangta ka Kate Diamond Lyngdoh na Mawlai Kynton Massar, Shillong, kaba la don ka jingangnud ban shim bynta ha ka ïakop siat khnam naduh ki por ba ka dang shong skul, ka la ïoh khur ïa ka takma ksiar ha ka Compound Women’s Archery ha katei ka lympung ha Chhattisgarh, hynrei wat hapdeng ka jingsngewtynnad jong ka ïa ka Archery ka hap ruh ban pynïahap ïa ka por ha ka jingpule bad ka jingïalehkai.
Na ka liang jong ka Kate Diamond, ka la pynpaw ïa ka jingai khublei ïa ka Sorkar jylla kaba la pynbit pynbiang ïa ki jingdonkam ha kaba ïadei bad ki tiar ïalehkai kaba la pynlah ïa ki ban nang pyntbit shuh shuh ïalade ha ka jingïalehkai kaba ki don sap.
“Ka thong jong nga ka long ban ïoh khur ïa ka takma ha la ïing ha ka National Games kaban sa long shen. Ka sorkar ka la kyrshan bad ka la pynbiang ïa ngi ïa ki tiar kiba donkam. Ngim kit ruh ïa kano kano ka jinglut jingsep ha ka leit ka wan, kaba ym shym la long kumta mynshuwa.”
U Juh Pa U Juh Nongtdu na Nartiang, West Jaiñtia Hills, uba la khur ïa ka takma rnong ha ka Greco-Roman wrestling kaba 60 kg, u dang pynkhreh mynta na ka bynta ka 39th National Games 2027 ka ban long ha Meghalaya, bad u la don ha ka jaka kilanmet naduh u bnai Naiwieng, 2025, u la pynpaw ba ka jingtrei shitom bad ka jingkut jingmut ka long u shabi jong kum kine ki jingjop.
“Nga sngewkmen haduh katta katta bad nga ai khublei ïa ka Sorkar Meghalaya kaba kyrshan ïa ki nongïalehkai, la ka long lyngba ki prokram pynkhreh ne ki coach nabar kiba ai jinghikai ïa ngi na ka bynta ka National Games.”
Halor kane na ka liang u Bah Isaiah Kharmawphlang, President ka Wrestling Association of Meghalaya, u la pynpaw ba ki nongïalehkai ki la ïaid lyngba ka jingpynkhreh kaba jur bha na ka bynta ka Khelo India Tribal Games, da kaba ïohlad ban pyntbit ïalade ryngkat ki buit ïalehkai kyrdan International.
“Ngi kyrmen ba kin nang bun ki samla kiba shim ïa ka kam ïalehkai namar ka don shibun ha ka. Ngi sngewnguh ïa ka jingkyrshan ba la ïoh na ka sorkar Meghalaya. Mynshuwa ngi ju mad jingeh bad bunsien ka jinglut jingsep la pynlut na la ka jong ka pla. Mynta kiei kiei ki la kylla, ki nongïalehkai bad ki synjuk ki la ïoh ïa ka jingkyrshan kaba paka.”
Da palat 300 tylli ki jaka ïalehkai ba la pynroi ha kylleng ka jylla bad palat 35,000 ngut ki nongïashim bynta ha ki lympung ïalehkai bapher bapher jong ka jylla, ka Meghalaya ka la nang kiew kum ka jaka pdeng na ka bynta ki lympung bad ki nongïalehkai kiba tbit.
Ki jingjop jong kine ki samla kiba don sap kin ïarap ban pynwan dur bad pynroi ïa ka sawdong sawkun jong ka kam ïalehkai ha ka jylla, ban pynkhreh ïa ki na ka bynta ki lympung ïalehkai National bad kumjuh ruh International.