Nongpoh, Naitung, 06: Ki nongïalam shnong hapoh ka lama ka Synjuk ki Rangbah Shnong Border Area kila pynsngew hakhmat u MLA ba ki donkam sa ar tylli ki Sub Center haka thaiñ Block II naka bynta ban pynsuk ïaki paidbah ba phah leit sumar namar ka long shisha ka jingeh kaba khraw ïaki paidbah ban leit sumar shaduh Mawlasnai PHC kaba la jngai kham pajih naki shnong kiba don haki thaiñ Khappud ka Meghalaya bad Assam.
Haba kren shaki lad pathai khubor naka liang u Bah B Sohtun President ka Synjuk ki Rangbah Shnong Border Area u la ong ba kum ka synjuk ka don ka jingangnud ban don sa ar tylli ki Sub Center kata haka shnong Ummat bad ka wei ha Sabuda kuba la dep ruh ban phah da ka jingthoh sha ka sorkar.
Kum ki paidbah ki ud ki nam namar ka leit ka wan kala kham jngai ban poi shaduh Mawlasnai PHC bad Bhoirymbong CHC kumta naka bynta ki jingshitom kiba kham rit ki kwah ba ka sorkar kan phaikhmat ban pynurlong noh ïa kitei ki jingdonkam ba hakhmat jong ki paidbah ka thaiñ, khamtam ki longkmie ba armet ba kim donkam shuh ban leit jngai.
Halor katei ka bynta naka liang u Bah Charles Marngar u la kular ban shimkhia bad ban buddien ïa katei ka kam naka bynta ka jingmyntoi ki paidbah bad ïa kaba mynta ha khmat u MLA u la kular ruh ïaki nongïalam shnong khappud ban ai shuwa kawei ka Ambulance ba ki paidbah ba pang ba shitom kin suk ban poi sha ki jaka sumar.
