Mawkyrwat, Jylliew, 22: Ka Youth Development Organisations (YDO) jong ka shnong Mawrap, South West Khasi Hills District hapoh ka jingïalam u Bah Steady Syiemlieh da ka jingsngewkitkhlieh ban pynneh pynsah ïa ki jingitynnad ïa ka mei mariang khamtam eh ha shnong Mawrap kaba dei kawei na ki jaka ba ki don ïa ka jaka jngohkai pyrthei kaba la khring ïa shibun ki paidbah na kylleng ki jaka na ka jingdon ka Kshaid Urnar kaba jrong bad kaba itynnad.
Ka Youth Development Organisations (YDO) ki la buh ïa ka thong ban pynneh pynsah itynnad ïa ki sawdong kiba ha syndah jong katei ka jaka jngohkai bad yntang kata ki don ruh ka jingthrang ba kane ka jaka kan lah ban kyntiew shuh shuh ha ki kam jngohkai pyrthei ban lah ban ïa nujor bad kiwei de ki jaka jngohkai pyrthei kiba la paw ha ka jylla Meghalaya kum ha ka shnong Mawlynnong.
Hadien ba ladep thung ïa ki tynrai dieng, u Bah Steady Syiemlieh u la ong ba ka jingrakhe ïa ka World Environment Day kam shongeh tang ha ka 5 tarik u Jylliew manla u snem ne ieid mariang tang shi sien shi snem hynrei ki dei ruh ban rakhe ne thung ïa ki tynrai dieng ha kano kano ka por kaba ki sngewbit ka ban long kumno ka dak ban sumar bad ban ai ka jingïada ïa ka mei mariang.
U la ong ba ban rakhe tang ha ka 5 tarik u Jylliew kam long kaba dei namar u tynrai dieng ïa uba ngi ngi thung u donkam ka jingsumar kaba manla ka sngi, kumta kam long kaba dei ban rakhe tang shi sngi. Ym tangkata, u la kyntu ruh ïa ki paidbah nongshong shnong ba kin long kiba husiar na kaba pynjot pathar ïa ki dieng ki siej, ki lum ki wah da ki jingmlien kiba sniew hynrei ki dei ban pyrkhat ruh na ka bynta ka jingdonkam jong ka pateng ka ban sa wan.
