Angnud ka Sorkar ban pynlong ïa ki sor bad nongbah ka jylla kiba khuid ba suba: Bah Wailadmiki

Shillong, Risaw 07: U Myntri ka sorkar jylla uba khmih ïa ka tnat Health & Family Welfare u Bah Wailadmiki Shylla ha ka sngi baar u la ong ba ka sorkar jylla ka da angnud shisha ban tyngkai ban pynneh pynsah ïa ka sawdong sawkun lyngba ki rukom pynïaid kam kiba dei katkum ka jingstad saïan haba ïadei bad ki ñuit ki ñier kiba ïaid lang bad ka state policy bad kumjuh ka jylla ka angnud ban pynlong ïa ki sor bad ki nongbah ka jylla kiba khuid ba suba.
Haba kren ha ka sngi pynkut ïa ka Swachhata Hi Seva 2025, u Bah Shylla, “Ka jylla ka dei kaba nyngkong napdeng kiwei pat ha ka ri ban don ïa ka solid waste management policy (SWMP) bad ki rukom treikam kiba biang, kaba la pynbna ha u snem 2019, bad ka thong jong kane ka rukom treikam ka long ban ïaid shaphrang ki kam ban ym don shuh ki jaboh ne ki ñuit ki ñier (zero waste). Baroh ki sor bad ki nongbah jong ka jylla ki don la ki jong ki rukom treikam haba ïadei bad ka jingbret ñuit pathar ne ka city solid waste action plan bad ka city sanitation action plan, kaba la bishar bad mynjur da ka Swachh Bharat Mission. Kum ka sorkar jylla ngi sngewkhia shisha halor ka jingpynneh ïa ka khuid ka suba bad kumjuh ruh halor ki jaboh jabaiñ, khamtam na ka jingkiew ka jingwan kiba jngohkai bad kumjuh ruh na ka jingwan ka National Games ha u 2027.”
U Myntri u la pyntip ba wat hpdeng ki jingeh ba la wanrah da ka khlam COVID-19, ka jinglum ïa ki jaboh ne ki ñuit ka la kiew ym duna ïa ka 50% ha u snem 2019 bad mynta ka la poi 83% ha u snem 2025.
Shuh shuh ka jingpynïakhlad ïa ki ñuit naduh ki jaka ba lum ñuit ka la kiew ym duna ïa ka 30% ha u 2019 sha ka 70% ha une u snem. Ka jinglah ka jylla ban kit ïa ki ñuit mynta ka la long 68%, haba nujor ban ïa ka 2% ha u 2019. La buh ruh ïa ki Processing plant ha baroh ki jaka sor jong ka jylla da ka jinglah ban buh ïa u ñuit kumba 215 ton ha ka shi sngi.
Haba ïaroh ïa ki nongtrei kiba ju pynkhuid ban pynthikna ba ka jylla kan long kaba khuid ba suba, u Myntri u la ong, “Mynta ka sngi ngi pyrshang ban pynlong ïa ki sor bad ki nongbah jong ngi kiba khuid bad kiba lah ban im, bad kumta ruh ngi donkam ban kular ban kyntiew ïa ka jylla ha baroh ki liang bad da kaba burom ïa kine ki briew kiba pynkhuid ïa ki jaka bapher bapher ngi kwah ruh ban pyni ïa ki nuksa ban kyntiew ïa ka mynsiem jong ka Swachhata Hi Seva.”
Ba la pynlong da ka tnat urban affairs bad ka Swachh Bharat Mission-Urban, ha ka jingïatreilang bad ka Shillong Municipal Board (SMB), ka Swachhata Hi Seva Campaign 2025, ka la pyni ba ka la leh kiba bun ki kam kiba thmu ban pynsngewthuh shaphang ka jingkhuid bad ban pynrung ha ka jingmut jong ki nongshong shnong ïa ka jingkitkhlieh halor kane ka bynta.
Katba u Chief Secretary Shakil P Ahammed ha ka jingkren u la ong, “To ngin ïatreilang bad nga kyrpad ïa ki kmie ki kpa, ki nonghikai, ki khynnah bad baroh ban ïatreilang bad ban pynlong ïa ka jylla kaba itynnad, kaba khuid tam bad ka jylla kaba kiew ha baroh ki liang.”
Kham hadien u Myntri u la sam ruh ïa ki khusnam sha ki 10 ngut ki nongtrei kiba ju pynkhuid halor ki jingaiti jong ki ïa ka kam ban pynlong ïa ka nongbah kaba khuid ba suba.
Ki 4 ngut kiba la shah pynkup burom ki long Shynnaki Dkhar na Nongkynrih, West Jaiñtia Hills, Deba Prasad Ghosh na Upper Mawprem, East Khasi Hills, Raju Najiar na Dulong West Jaiñtia Hills District bad Aiborlang Lyngdoh Marshillong na Nongstoiñ.
La sam ïa ki da ki memento bad ka pisa kumba T 20,000 hajar.
Ha kane ka sngi ka la don ruh ka jingïasoi ïa ka MoU hapdeng ka Shillong Municipal Board bad 5 tylli kiwei ki Urban Local Bodies jong ka jylla kiba hapoh ka Swachh Shehar Jodi (SSJ).
Kane ka prokram ka dei ka jingsdang ba la plie da ka Ministry of Housing bad Urban Affairs (MoHUA) kum shi bynta na ka Swachh Survekshan (SS) hapoh ka Swachh Bharat Mission-Urban (SBM-U). Ha kane ka sngi la don ruh ka cultural prokram ba kynthup ka – Shad Pliang, bad ka jingrwai da ka Khasi band “Na u Bnai”.