Shillong, K’lyngkot 20: Kum ka jingpyrshang kaba tyngeh ban pynlong ïa ka New Shillong kaba lah ban kyrda ïa ka jingkylla ka suiñbneng, ka Sorkar Jylla ka la pyntreikam ïa ka project thungdieng ban pynkylla ïa kane ka sor ban sa mih thymmai kum kawei na ki jaka sor ba jyrngam tam ha ka thaiñ.
Hapoh kane ka project, ba la sdang pynïaid ha u snem 2025, ka Sorkar ka thmu ban thung haduh 6,000 tylli ki dieng harud ki surok ba jrong palat 25 km bad 2 km ka jaka, da kaba kynshew haduh T.2.5 klur ha kine ki san snem ban wan.
Ki heh sorkar ki ïathuh ba kane ka sienjam ka dei kaba la pynwandur ha ka ban pynthikna ba ka jingïaid sted ki kam pynroi ha ki jaka sor kin ym ktah ïa ka sawdong sawkun ka mariang.
Ka jingthung dieng kan ïaid naduh ki lynti ïaid ba kongsan ha New Shillong Township, kynthup ka Lad Ummir-ka lynti Mawkhanu, ha kaba haduh 10,000 tynrai ki dieng lah buh thong ban thung, ïa kaba haduh 6,340 tynrai lah dep ban thung mynta harud jong ka surok kaba la ïaid 16.56 km.
Ym kumba long kiwei ki jingpynitynnad ba ju leh man ka por, kane ka project kan long kum ka lynti ban wanrah ïa ka jingjyrngam. Katkum ki kot ki sla ba la pynkhreh da ka Sorkar, kane ka jingthung dieng la khmih lynti ba kan pynduna ïa ka jingjaboh ka lyer, pynduna ïa ka jingshit kyrang ka sngi, tehlakam ïa ka jingshah rong ka khyndew bad pynthikna ïa ka jingshngaiñ ki surok.
“Kane ka lynti ban pynjyrngam kan pynlong ïa ka New Shillong kum ka sor kaba ïaid ryngkat ryngkat ha ka jingkiew shakhmat bad ka jingpynbiang tarajur bad ka mariang,” ong ki kot ki sla ka Sorkar.
Ka jingïashimbynta lang jong ki shnong ki thaw ruh lah wanrah lang ha kane ka plan, ha kaba yn pynïadon bynta ïa ki shnong ki thaw ha ka jingthung dieng, jingai jinghikai bad ka jingsumar ïa ki dieng ïa kaba la khmih lynti ba kan aikam aijam bad pynthikna ba kan ïai neh.
