Angnud ka sorkar ban pyndep kloi ka jingmaramot ïa ka NH-6 wat hapdeng ki jingeh: Kyrmen Shylla

Shillong, Naitung 07: U Myntri ka sorkar jylla bad u MLA ka UDP na Khliehriat, u Bah Kyrmen Shylla ha ka sngi Nyngkong u la pynthikna ba ka sorkar ka la angnud ban pyndep ïa ka jingmaramot ia ka surok National Highway-6, wat hapdeng ki jingeh kiba bun.
U la kubur halor ki jingslem ki jingshna ïa ka surok, khamtam eh hapoh ka Khliehriat-Ratacherra road.
Haba kren sha ki lad pathai khubor u Bah Shylla u la ong ba ka jingslem ka dei na ka daw ka jingpyndonkam da ka dewbilat ban shna ïa ka surok, kaba donkam shibun ka por haba nujor ïa kaba siang rong.
U la batai ba ïa ka surok la shna da kaba pyndonkam da ka dewbilat, nyngkong ha ka thaiñ kaba la shim por ban pyndep na ka daw jong kane kam.
U la pynpaw ka jingeh ban shah ïa ka jingïaid ki kali ha ka por ba shna ïa ka surok, ha kaba kane ka buh u pud u sam ïa ka por treikam bad kaba la wanrah ka jingsuki ki rukom treikam.
U Bah Shylla u la kyrpad ïa ki paidbah bad kiba pyndonkam ïa ka surok ban ïaishah bad kine ki jingslem, da kaba banjur ba ka jinglah ban pyndep ïa ka surok kan ai jingmyntoi kaba neh slem.
“Nga kyrpad ïa ki paidbah bad kiba pyndonkam ïa ka surok ba kin ïaishah bad ngi naba ka dei tang ka jingshim ïa ka por hadien ba la pyndep ïa ka surok kin ym kynmaw shuh ïa kaei kaba la jia ha ki por ba la dep naba kane ka surok kan ai jingmyntoi ïa ki paidbah. Kane ka surok kan ai ka jingbishar ba hok ïa ki paidbah,” u la ong.
U la pynthikna ba ka sorkar kan leh ïa kaba bha tam ban pyndep ïa ka kam khamkloi katba lah.
U la kyntu ïa ki paidbah ban long kiba ïaishah bad ban sngewthuh bad u la pynthikna ïa ki ba ka surok kan ai ka hok ïa ki paidbah bad ban pynbha ïa ka jingim jong ki.