Angnud ka RWF ban pynbha ïa jingkieng, ki skul bad ki kam pynroi ha Shyntor Bulia

Nongpoh, Nohprah 13 : Ka Shyntor Festival kaba dei kawei naki tamasa bala pynlong haka shnong Shyntor Bulia ha Ri-Bhoi District kadei kawei naki tamasa kaba la khring ïakiba bun ki paidbah na kylleng ki jaka ïa kaba la sdang naduh ka 11 tarik haduh ka 13 tarik Nohprah.
Kane ka tamasa ka long kaba khampher namar ki nongpynïaid hapoh ka kynhun Rongjeng Welfare Foundation ki don ka jingangnud ban leh ki kam ba bha bad ki kam pynroi ha katei ka shnong kaba dang sahdien bad donkam shibun ki jingïarap khamtam ki kam pynroi naka sorkar, namar kumba long mynta bun naki paidbah ki mad jingeh haka leit ka wan namar ka jingbym don ka jingkieng kaba paka ban kam ïaka Wah Umsiang namar ïa katei ka shnong la ker tawiar da ka Wah Umsiang bad ka Wah Umsha.
Haba ioh ban ïakren bad ka Kong Rosana Lyngdoh kaba dei kawei naki nongïalam ha katei ka kynhun kala ong ba kane ka tamasa ka don la ka jong ka jingmut, namar kum ka kynhun ka don jingmut ban pynmih pisa lyngba kane ka tamasa naka bynta ban wanrah ïaki kam pynroi ha katei ka shnong, namar katei ka shnong ka dang dei kaba rit kaba dang don tang kumba 65 iing bad kum ka kynhun RWF ka kwah ban pynpaw pyrthei ïa katei ka shnong kaba itynnad kaba lah ruh ban pynlong kum kawei naki jaka jngohkai pyrthei.
Shuh shuh kala ong ba ki don ruh ka thong ban pynbha ïaki skul pule, bad ka jingkieng kaba kham kongsan eh bad lada ki paidbah ki ai ka jingsnohkti lang kan long ka jingkyrkhu bad ka jingmyntoi ïa katei ka shnong.
Ka la ïathuh ruh ba ha katei ka tamasa kin don ki jingpyninam ïaki kolsor bad ki tynrai, ki jingïalehkai phutbol, ki trekking, ka put ka tem ban sa wan ruh ban shim bynta da ki kynhun bapher bapher, namar kum kine ki jait tamasa kim dei than kiba lah ban pynlong tang haki jaka sor hynrei wat haki jaka nongkyndong, kumba ka Shyntor Bulia ka don tang kumba 30 ne 40 km na Nongpoh hynrei bun ki briew kim tip ïa katei ka shnong, hynrei lyngba kane ka tamasa kan long kum ka jinggpynpaw pyrthei ruh ïaka jingiytnnad katei ka shnong.
Shuh shuh kala ong ruh ba kane ka tamasa kam dei satia kaba ki thmu ban kamai pisa namar ki don ka jingangnud ban pynmih pisa naka bynta kane ka shnong, khamtam ban pynshna ïaka jingkieng ha katei ka shnong ba bun naki paidbah naduh ki khynnah skul, khamtam kiba pang ba shitom ki shem jingeh ban kam ïa katei ka wah namar ka heh um haka por lyiur.
Na ka liang u Bah Rowel Mawphniang kum u Rangbah Shnong u la pynpaw ka jingsngewkmen kaba khraw hadien ka jingwan katei ka tamasa ha katei ka shnong ba ka sorkar ruh kan phaikhmat ha kaba ïadei bad ki jingduna bad jingsahdien haki kam pynroi ha katei ka shnong, kumba ka dei ka shnong kaba lah ban pynkylla dur kum ka jaka jngohkai pyrthei ban kyntiew ruh ïaka ioh ka kot ki paidbah.