Angnud ka Ri Bhoi Dorbar ba ki MLA na Ri Bhoi kin pynmih kawei ka sur halor ka Reservation Policy

Nongpoh, Jylliew 11: Ha shuwa ban ai jingmut sha ka Expert Committee ba la thung da ka sorkar jylla ban ïa tai ne tih bniah halor ka Reservation Policy na ka bynta kata ka bhah thungkam thungjam, ka Ri Bhoi Dorbar ha ka sngi Saitjaiñ ka la khor kyrpang ïa ki nongmihkhmat bad ryngkat ki riew pawkhmat ka Ri Bhoi na ka bynta ban ïa kren sani halor ka Reservation Policy.
Ïa kane ka jingïalang la pynlong ha ka ophis treikam ka Ri Bhoi Dorbar ha Umsning kaba ki MLA bad MDC na Ri Bhoi ba kynthup ïa u Bah Mayral Born Syiem, MLA ka Nongpoh, Bah Charles Margnar, MLA ka Mawhati, u Dr. Celestine Lyngdoh, MLA ka Umsning bad kynthup ruh u Bah Balajied Rani, MDC ka Nongpoh ki la wan ban shim bynta ban ïa kren halor ka Reservation Policy kumba ka don ka jingïakhih kaba jur hapoh ka jylla na ka bynta ban pynkylla noh ïa katei ka Reservation Policy.
Kiwei kiwei kiba la ïa don lang nalor ki riew rangbah ki kynthup ruh ïa u Bah R.B Sahdap, President ka Ri Bhoi Dorbar, u Bah R.R Makdoh, Adviser, u Bah Bipul Thangkhiew, President ka RBYF, u Bah Rocky Marweiñ, Rangbah Shnong ka Umsning Proper-B bad kiwei kiwei kiwei dei ki riew rangbah.
Haba kren sha ki lad pathai khubor, u Bah RB Shadap President ka Ribhoi Dorbar, u la ong ba ka jingthmu ka Ri Bhoi Dorbar ban khot ban wer ïa ki nongmihkhmat bad ki riew rangbah ka dei halor ka jingtymu ban ïakren ne ïa tai halor ka Reservation Policy ba ka Ri Bhoi Dorbar ka ai khublei kyrpang ïa baroh kiba la wan ban shim bynta ban pynpaw ne ai jingmut halor shibun ki mat kiba dei halor ka Reservation Policy shuwa ban aiti sha kata ka Expert Committee.
U la ong ruh ha Kane ka jingïalang la ïoh ban ïakren sani bha halor ka bhah thung kam jong ka jylla bad u la ïathuh ruh ha kane ka jingïalang ka dei tang ka jingïamir jingmut bad khlem ïashim rai eiei bad ka Ribhoi Dorbar kan dang pynlong shuh shuh ïa kane ka jingïalang ban nang ïathir sani bad ban ïoh ïaka jingmut kaba biang eh na kiba bun ki riew shemphang bad ki riew pawkhmat ka Ri Bhoi nalor ki nongmihkhmat paidbah.
Shuh shuh, u la pynpaw ruh kaei kaba hakhmat eh ba ka Ri Bhoi Dorbar ka angnud ka dei ka jingkwah ba baroh ki nongmihkhmat na Ri Bhoi ki dei ban ïathir sani bha halor ka Reservation Policy bad kumjuh ruh ka Roster System bad ka sur kaba mih na Ri Bhoi kum ki nongmihkhmat paidbah ki dei ban ai lang kajuh ka sur khnang ba baroh ki jingai jingmut na Ri Bhoi kin aiti pat sha kate ka Expert Committee. U la ïathuh ba kane ka kynhun kan leit ruh ban ïakynduh ïa u Deputy Commissioner ka Ribhoi ban ïa kren ban pyntikna halor ka jingïoh kam jong ki khun samla ka Ri Bhoi hapoh ka District.