Nongstoiñ, Naitung, 14:Naduh ba ka Mawshynrut ka la ïoh ïa ka ophis treikam ba pura kaba dei peit ïa ka bording, ka la ai jingmyntoi shibun ïa ki paitbah ha baroh ki shnong kiba hap ha ka jingpeit jingkhmih jong ki nongtrei kiba don ha katei ka tnad treikam kaba don ha Riangdo.Wat la katta ruh ki dang don shibun ki jingduna namar ka jing jngai palat jong ki shnong bad ka jingbym pat biang jong ki surok kali.
U Rajiv Dutta Executive Engineer ka MePDCL Nongstoiñ Division, haba ïakren bad u nongthoh khubor mynta ka sngi ha kamra treikam jong u, u la ong ba ka ophis mynta ka donkam kali ha katei ka ophis ha Riangdo, namar haba ka laiñ ka don jingthut na ka jingkhyllem ki dieng ha ki jaka khlaw, ki nongtrei ki hap ban beh wut wut ban maramot, khnang ba kan ym ktah ïa ki paitbah nong pyndonkam bording bad ruh ba ki jingri jingdup kin ym ngat ha ka jingshah bat bor ding.
U la ong ruh ba teng teng ki don ki transformer kiba sniew kiba hap ban leit kit na ka bynta ban wanrah sha ophis ban maramot, hynrei lada dei ha ki shnong ki bym pat biang ki surok, ka shem jigneh haduh katta katta .
Utei u heh ka MePDCL u la ong ruh ka ophis mynta ka don kam kyrkieh ban buh da ka Bolero Camper 4×4, namar ka kham lah ban ïaid ha ki surok sha ki nongkyndong ki ba don ïa ki surok kiba khohruh khohram bad ki don ruh ki por ba ki hap ban leit maramot ïa ki poll electric ba la sniew bad ki hap ban kit da kiba bha ban bujli bad la kim dei ki 4×4 ki shem jingeh lada ki surok ki sniew.
Ha kajuh ka por u la ong ba namar ba ka ophis haduh mynta kam pat lah ban buh da ki kali sorkar, kumta ka hap ban shu shim wai na ki riew shimet. Kumta na ka bynta ka jingdonkam jong ka tnad treikam ha Riangdo, utei u EE ka MePDCL u la kyrpad ïa kiba don Bolero Camper 4×4 kiba don ïa ki Commercial Registration number kiba dang shu dep registered hadien jong ka 01/Kyllalyngkot/2022, ki lah ban aplai bad ka ophis kan siew da ka bai wai ha ka dor 22,500 bad ki don la ki kyndon ba ka ophis kan sa pynbeit bad mynjur.
U la ong ruh ba kino kino kiba kwah ki la ban aplai lane wan ïakynduh ïa u ha ophis ha Nongstoiñ ha shuwa ka 25 tarik mynta u bnai, khnang ba un pynshai ha kaba ïadei bad ki jingdonkam baroh.
