Angnud ka FFPO ban kyntiew ïa ka kam ri dohkha ban myntoi ki nongrep ka jylla
![](https://mawphor.com/wp-content/uploads/2024/07/WhatsApp-Image-2024-07-16-at-5.51.30-PM-Copy.jpeg)
Nongpoh, Naitung, 16: Kum kawei na ka kynhun ki samla na Ri Bhoi District, lyngba ka Fish Farmers Producer Organization (FFPO), ki don ïa ka jingangnud kaba khraw na ka bynta ban kyntiew ïa ka kam ri dohkha ha ka jylla, khnang ba kum ka jylla kam donkam shuh ïa ki dohkha ba wan kiwei ki jylla ba na shar ka jylla Meghalaya.
Ïa kane ka Ri Bhoi Fish Farmers Producer Organization (FFPO) la dep ban register ha ka 30 tarik u Kyllalyngkor 2023 bad ka dei ruh ka kynhun ba la ïoh jingithuh naduh ka sorkar kmie, ka sorkar jylla, ka ophis u Deputy Commissioner ka Ri Bhoi bad ruh na ka tnad Fishery ka sorkar jylla.
Kane ka kynhun, haba buh ïa kata ka thong ban kyntiew ïa ka kam ri dohkha ha ka jylla, ka la ïoh ruh ka jingkyrshan na ka National Cooperative Development Corporation (NCDC). ka Cluster Based Business Organization na Assam ban pyntreikam ïa ki jingthmu kane ka kynhun bad ka long ruh ka jingmyntoi ïa kane ka kynhun ha kaba ïa ki nongtrei jongka, la kyrshan ban ai tulop da ka NDDC.
Haba kren sha ki lad pathai khubor, u Chairman ka FFPO, U Bah Pynhun Mawroh, u la ai ka jingpynshai ba la wan rah ïa kane ka kynhun ba la tip kum ka Fish Farmers Producer Organization, ka dei na ka bynta ban kyntiew ïa ki kam ri dohkha ha ka District bad ka jylla hi baroh kawei.
U la ong ruh ba lyngba kane ka kynhun, ka don ïa kata ka thong ym tang ban ai kam ai jam ïa ki khun samla ka jylla lyngba ki kam ri dohkha, hynrei ban don ruh kata ka thong ba ha ka jylla, ngin pynmih hi ïa la ki dohkha bad ym shuh ban dang shaniah ïa ki dohkha ba bam ki paidbah ba hap ban wan rah na kiwei ki jylla jong ka ri.
Shuh shuh, u la bynrap ruh da kaba ong, ba kane ka kynhun kan nym lah ban pynurlong ïa kane ka thong kaba ka angnud ban kyntiew ïa ki kam ri dohkha, hynrei ka donkam ka jingkyrshan naduh ki paidbah, ki seng bhalang ba paw ka jylla bad khamtam ka sorkar jylla ba kan kyrshan da kaba thaw ïa ki lad ki lynti kumno ban kyntiew ïa ki kam ri Dohkha, khnang ba ka jylla jongngi kan nym shaniah shuh ïa ki dohkha ban bam na kiwei ki jylla bad ka jylla hi kan lah ban pynmih la ka jong ban kyntiew ïa ka ïoh ka kot ki nongri dohkha bad ruh ha ka jylla hi baroh kawei, u la bynrap.