Shillong (PIB): U Myntri Rangbah duh ka ri, u Narendra Modi u la aiti ia ka iing dorbar thawain Parliament ba thymmai sha ka ri ha ka 28 tarik mynta u bnai.
Ha ka jingai jingkren ha ka jingialang, u Myntri Rangbah duh u la ong ba ki don katto katne ki khyllipmat ha man ka histori jong ka ri kiba ngi rakhe. Ki don ki tarik kiba sah jingkynmaw shirta, la ong u Myntri Rangbah Duh. Ka 28 tarik u Jymmang, 2023 ka dei kum kane ka tarik. “Ki briew jong ka India ki la ai sngewbha ialade na ka bynta ka Amrit Mahotsav,” u la ong. U Myntri Rangbah Duh u la ai khublei ia baroh ha kane ka sngi kaba kyrpang.
U Myntri Rangbah Duh u la ong ba kane kam dei tang ka jingtei hynrei ka dei ka dak jong ki jingangnud bad ki jingthrang jong 140 klur ngut ki briew ka ri. “Kane ka dei ka jaka ba kyntang jong ka synshar paidbah kaba ai ia ka khubor jong ka India sha ka pyrthei,” u la ong da kaba bynrap, “Kane ka Iing Dorbar Thaw Ain Parliament ba thymmai ka pyniasoh ia ka jingpynkhreh bad ka jingshisha, ka polisi sha ka jingurlong, ka jingkut jingmut sha ka jingpyntreikam bad ka sankalp sha ka siddhi”. Kane kan dei ka rynsan na ka bynta ka jingpynurlong ia ki jingthrang jong kito kiba la iakhun na ka bynta ka jinglaitluid. Kan iohi ia ka jingkhie jong ka Aatmnirbhar Bharat bad kan iohi ia ka jingurlong jong ka Viksit Bharat. U Myntri Rangbah Duh u la ong ba kane ka jingtei kaba thymmai ka dei ka dak jong ka jingia-im lang jong kaba hyndai bad kaba katkum ka juk mynta.
“Ki kam ba thymmai ki lah ban wan tang haba ngi iaid ha ki lynti kiba thymmai,” la ong u Myntri Rangbah Duh uba la ong ruh ba ka India ba thymmai ka dang pynurlong ia ki jingthrang ba thymmai bad ka dang shim ruh ia ki lad kiba thymmai. “Ka don ka bor kaba thymmai, ka jingskhem jingmut ba thymmai, ka jingkut jingmut ba thymmai, ka jingpyrkhat ba thymmai bad ka jingiaid lynti ba thymmai. Ki don ki jing thmu ba thymmai, ki lad ba thymmai ki jingkut jingmut bad jingshaniah ba thymmai,” la ong u Modi. U Myntri Rangbah Duh u la ong ba ka pyrthei ka peit ia ka jingkut jingmut ka India, ka jingkhlain jong ki briew ka ri bad ka bor jong ki briew ka ri da kaba burom ia kine. “haba ka India ka iaid shaphrang, ka pyrthei ka iaid shaphrang,” u la ong. U Myntri Rangbah Duh u la ong ba ka Iing Dorbar Thaw Ain Parliament ba thymmai kan wanrah ia ka roi ka par jong ka pyrthei na ka roi ka par jong ka India.
