Aiti u ma Lahkmen Rymbui ïa ka kali ban kit ïa ki khynnah skul bad sam work orders ha shnong Kyrweng bad Khonglah

Amlarem, Rymphang 16: U myntri ka sorkar jylla ba dei peit ïa ka tnad pule puthi u ma Lahkmen Rymbui MLA ka 7-Amlarem Constituency ha kane ka 14 tarik sngi saitjaiñ ula aiti ïa ka kali (Eeco) haka shnong Kyrweng WJHD na ka bynta ban kit ïa ki khynnah skul ka thaiñ, la sam ruh ïa ki Work Orders ban pynbha ïa ki ïing skul bad ki Dorbar Hall hapoh ka skim SRWP 2025–2026, haka jingïalang bala pynlong ha katei ka shnong kaba hap hapoh ka Amlarem Sub-Division.
Ha kane ka sngi la wan ban ïadonlang da u MDC ka War East ma Meddling Swer, ki Rangbah Shnong, ki Dkhot Executive Committee, ki longkpa, ki longkmie bad ki khynnah skul.
U ma Lahkmen Rymbui haka jingkren kum u kongsan ula ong, ka jingplie ïa kane ka kali ka long ka jingmyntoi bad ka jingshngaiñ ïa ki khynnah skul ka thaiñ kiba leit skul sha Muktapur.
Shuh shuh ula kyntu ïa baroh naduh ki kmie ki kpa ba kin kyrshan bad ai mynsiem bha ïa ki khynnah skul na ka bynta ki jingpule kiba kham shajrong, ula khot ïa ki nongïalam shnong bad ki nongshong shnong ba kim dei ban pyndonkam bakla ïa katei ka kali hynrei ki dei ban nang kumno ban kynshew ïa ka pisa na ka bynta ban ïoh pynbha ïa ka kali ha ki por ba donkam, khnang ba kan lah ban bteng ka jingshakri ha ki snem ban wan.
U ma Lahkmen Rymbui ula pyntip ïa ki Work Orders jong ka SRWP 2025–2026 kiba la sam ha katei ka sngi ki long kyrpang na ka bynta ka jingbha jingmiat jong ki ïing skul bad ki ïing Dorbar ha shnong Kyrweng kaba la kot ka jingshna ïa ka Additional Classroom – ?5,00,000, ka paiñkhana skul – ?1,00,000.
Katba na ka bynta ka Shong Sankhat (Khonglah), la sam ïa ka Work Orders ban pynshna ïa ka surok shnong– ?5,00,000, ka ïing Dorbar ?2,00,000. U kyrmen skhem ba kine ki kam pynroi kiba la aiti kin long ka jingmyntoi ïa ka pule puthi bad ki kam shnong hapoh ka Amlarem Sub-Division.