Shillong, Nohprah 13: Kumba 8 tylli ki shnong kiba don ha sor Tura, ba kynthup ïa ki 754 tylli ki longïing ki la dap da ka jingkmen bad jaw ummat hadien ba khatduh ki la ïoh ïa ki kot ki sla jong ki jaka shim wai ha ka jaka kaba ki la im mynta la bun bun snem.
Kine ki longïing ki dei kiba sah da kaba shu kyntur sha ka jaka jong ka sorkar, bad mad ïa ki jingbym thikna bad ki jingeh. Ïa ki kot ki sla la aiti da u Myntri Rangbah u Conrad K. Sangma ha ka jingdonlang u Myntri Sorkar u Marcuise N. Marak.
U Myntri Rangbah u Conrad K. Sangma u la pynkynmaw ïa ki jingeh ba mad da kine ki longïing bad ong, “Manba u nongïalam jong ngi u P.A. Sangma u wan jngoh ïa ki dong ha Tura, ki briew kin wan sha u bad ki jingsngewkhia halor ka jingsah jong ki hapoh ka jaka sorkar bad kiba bun ki jingeh ba ki mad. Bun na kine ki shnong kim don ki surok, kim don bording, khlem um. Ki mad jingeh ruh ban ïoh ïa ki caste certificate, ki syrnot sngikha, bad kiwei ki kot ba kongsan. Ha ki snem ba hadien hadien ba nga la ïaleh ïa ka election ha Tura, ki briew na kine ki juh ki jaka ki la leh la san da ki juh ki jingsngewkhia. Kumta nga la rai ban shim ïa kane ka kam. Ka long kaba eh, hynrei da ki jingpyrshang ngi la lah ban pynbeit ïa kane ka jingeh.”
Ka jingsam ïa ki kot jaka ba shu ai wai ha kane ka sngi, ki don kumba 452 ki bigha jong ka jaka la sam sha ki paidbah kaba dei ruh katkum ka por ba la ai wai lyngba ki kot ki sla.
U Myntri Rangbah u la pynpaw ka jingsngewkmen haba u la kynmaw ïa ki jingpyrshang jong u P.A. Sangma. “U P.A. Sangma u la pyrshang ban pynbeit ïa kane ka kam. Ka la dei ka kam kaba la neh slem. U shait ïai ong barabor, ‘mano kine ki briew kiba im basah ha ka jaka sorkar? Kidei ki briew jong ngi, bad ngi donkam ban ïarap ïa ki.”
U la kyntu ïa ki shnong ban pdiang ïa ki kot jaka bad ban dei ban siew da ki instalment. “Ngam shym la pynbor ïano ïano ban pdiang ïa ka. Katba u Conrad u dang shong ha shuki, ngin ym kyndang ïano ïano. Hynrei kaba sngewsih ka long kaei ka ban jia pat hadien jong nga.”
Ka Settlement of Government Land under Tura Town Area, West Garo Hills District ka la sdang ha ka snem 2023-2024.
Ka kynhun myntri sorkar ha ka jingïalang kaba la long ha ka 26 tarik Naiwieng, 2025 ki la pynskhem bad mynjur ïa ka settlement of Government Land under Tura town area, West Garo hills district ha ki 8 tylli ki shnong ba kynthup ïa ki 754 tylli ki longïing halor ka jaka kaba heh 149.5 acres ne 452 Bigha.
