Shillong, Nohprah 14 : U Myntri Rangbah ka Jylla Conrad K Sangma ha ka sngi Nyngkong u la aiti ïa ki pata aiwai sha ki nongshong shnong ma Balsrigittim bad Warimagre ha Williamnagar, East Garo Hills ha ryngkat ka jingdon lang u MLA u Marcuise Marak.
Ki la don haduh kumba 1200 ngut ki nongshong shnong na baroh ar tylli ki shnong kiba sah ha katei ka jaka jong ka sorkar da ki snem snem bad mynta ki pan ïa ka jingbit ban ïoh shong ïoh sah hangtei.
Kitei ki nongshong shnong ki ju mad shibun ki jingeh na ka daw ba kim don ïa ki pata ba donkam ban ïoh shim ram bad kiwei ki jingmyntoi na ka sorkar.
Kumta ki nongshong shnong lyngba ka jingïarap jong ka sorkar ban weng ïa ka jingeh hapoh ka jingïalam jong u Myntri Rangbah, ka tnad Revenue khatduh ka la ai da ka pata.
Haba kren ha ka jingïalang u Myntri Rangbah u la ai ka jingïaroh ïa u MLA na bynta ka jinglah jong u ban lum lang ïa baroh ban pynbeit ïa kitei ki jingeh baroh ba kitei ki paidbah ki kynduh.
U la ïathuh ruh ba ha Tura bad Williamnagar ki don ki dong kiba kynduh kum kitei ki jingeh ba ïadei bad ka jingwan shong shnong, kumta u ong ba ka sorkar ka la wad ki lad da kaba wanrah da kitei ki pata kaban plie lad ïa ki ban ïoh jingmyntoi na ka sorkar ha ki shnong jong ki.
Ha ka prokram hynne ka sngi, u Myntri Rangbah ryngkat u MLA ki la aiti ruh ïa ki pata sha ki 17 tylli ki longïing jong ka Balsrigittim bad 6 ngut na Warimagre.
