Shillong Nohprah 06: Ki Pulit ha ka 3 tarik mynta u bnai ha ka por 5.30 mynstep, ki paidbah ki la ïoh bat markhmat ïa u Clifford Marbañiang ba la 26 snem ka rta, katba u dang pyrshang ban leh ka kam tuh na kawei ka Ïing kaba ha Lumshatsngi, Shillong. Kham hadien ïa utei u ba la shah kynnoh la aiti sha ki pulit. Ha kawei ka jingjia u Laloo Prasad Sangam u la phah ka jingujor ba ha ka 28 tarik u Naiwieng, 2025 ha ka por 6.20 mynmiet, ki runar bym lah ban ithuh ki la tuh ïa ki tiar telecom kiba shongdor T. 26.1 lak na u mobile tower ha Iawmusiang, Jowai (WJH).
Shuh shuh ha kawei pat ka jingjia ha ka step jong ka 2 tarik mynta u bnai, u Muneshwar Singh da ka ktien u la ïathuh ba ki runar bym lah ban ithuh ki la pynjulor ïa ka Ïing jong u kaba ha Pahamsyiem, Mawkapiah ba hab ha Nongpoh PS (RB).
