Aiti ki bor pynïaid distrik ïa ka pisa `3 lak bai lutksan sha ka ïing u Dilseng Sangma

Shillong, Rymphang 08: Ka sorkar jylla ka la aiti ïa ka pisa bai lutksan kaba T. 3 lak sha ka ïing ka sem jong u nong alam ka seng ACHIK uba la khlad noh u Dilseng M Sangma, uba la shah pynïap ha ka jingthombor ki paidbhur ha Goalgaon, West Garo Hills.
Ki heh ophisar jong ka bor pynïaid District ha ryngkatlang bad ki nongïalam shnong ki la aiti ïa ka pisa lyngba ka cheque kaba la wan napoh ka Chief Minister’s Special Grant sha kane ka longïing.
“Ki duhnud jong ngi, ki don bad kane ka longïing kaba la duhnoh ïa la u jong u dkhot bad kaba mad ïa kane ka jingsngewsih ha kum kane ka por kaba eh bha. Ka jingduh ïa kiba ieid ba thoiñ kan ym long satia kaba suk, bad ngi kyrmen ba da kane ka jingkyrshan kan wanrah ki jingpyntngen,” thoh u Myntri Rangbah lyngba ka social media.
Lah ban pynkynmaw ba ha ka 9 tarik u Kyllalyngkot, u Sangma u la shah pynïap ha ka jingthombor jong u paid bhur ha kaba ma u bad ka kynhun jong u ki dang jurip ïa ka par tih maw beaiñ kaba don ha katei ka thaiñ.
Kumba long haduh mynta, kumba 10 ngut kiba la shah suba donkti ha kane ka jingjia ki la shah kem, kynthup ïa u trai jong ka par maw bad u trai kawei ka karkhana kaba don ha kane ka thaiñ.